Unsern fruntlichen gruss zuvor, liebe frunde! Als ir uns beschreben hat, dieses habe wir wol vornommen, wy das Gotsche Schoff mit uns gerne noch vorkomen welle. Nu ist das euch selber wissentlich, das wir ime das ny auszgegangen haben noch ungerne uszgehen wellen. Nu thun wir euch zu wissen, das lande unde stete an dem nehsten montage eynen tag hatten zu der Lobaw und worden des zu rote und schreybin Gottschen eynen brieff mit den herren vom Luban und bathen Gotschen fruntlichen, das er den gefangenen tag sulde geben uff senthe Michels tag in desin 14 tagen, ader wenne is Gotschen an ebindisten were, welden sy eynen tag haben zu Bertolsdorff mit Gotschen. Doroff Gotsche den 5 landen und steten wedir geschrebin hat, das her noch nicht mit seynen frůnden zu rothe were et cetera. Und schreib, wie das dy lande und stete sulden die eren zu em senden off den Greiffenstein, so worden sie wol hören seine meynunge. Doroff lande unde stete morgen einen tag gemacht haben ken der Lobaw, da sy die sache handeln werden.