Thimo von Colditz et cetera an land und stat Gorlitz. Als ir mann und stat Budessin und mir von wegin der Lobaw geschriben habt, mich irmanende, die zu bestellin et cetera: sulchir euir besurgunge und gutter willen, den ir mit bylegunge dahin meinet zu thune, dancke ich uch mit flisse. Und irmane uch wedirumb an unsirs allergnedigsten herrn des koniges stad, das ir von land und stat euir reisigen gezug, so sterckst ir möget, von stund dahin in dy Lobaw schicket. So ir das gethan und mir geschrebin habt, wil ich mich selbst mit myner macht von stadan dahin by sy fügen, und dy Lobaw, so getruwlichste ich ymmer kan und mag, helfin wehrin und behaldin et cetera. Wenn ir wol achtin möget, das mir mit fussmennern da nicht füget zu legen. Wenn, wo ir des nichten tet, und geschege irgend schaden an der Lobaw verlost halben, da got vor sey, das wolde ich an unsern allirgnedigsten herrn den konig brengen; das ich das nicht bedürffe, das wil ich gerne umb euch vordienen. Gegebin am mitwoch nach quasimodo.