Unseren fruntlichen grus zuvor, erbern wiesin herrn, libin frunde! Als ir uns geschrebin habet, das uch vorbotschaft were, wie das die ungetruwen keczer die stat Sittaw suldin berant habin und bittet, uch dovon eygintliche uszrichtunge zuvorschriben et cetera: als thun wir uch zu wissen, das sie am sonnobinde nehist vorgangen in der dreyzehnden stunden noch dem ganzen seyger die stat Sittaw mit grosser macht berant hatten und am sontage dorzu gestormet. In dem zugange sie Tammen von Gersdorff und sust fuste andere luthe und unser gute frunde irslagen haben, des sie auch nicht fromen gewunnen haben. Und am montage sie sich davon irhabin haben und her in das land gein Gorlicz gerucket seyn, dorynne haben sie gebrand und geheret. Hute seyn sie obir die Nysse gezogen gein Sydenberg do bornen sie abir und heren, und haben sich gein der Slesie gekert, dach konnen wir eygintlich nicht gewissin, wo sie hyn wullen. Mochtet ir dem almechtigen gote zu lobe, der juncfrauen Marien und dem heiligen cristenglouben zu sterkunge und dorzu helffen, das man die bosen keczer tilligete, wir welden uff unserem orte helffen und mit ganzer macht dorzu thun. Geben an der mittewochen vor Sophie under unserm stat secret.

Burgermeister unde rathmannen der stat Gorlicz.