Unsern dinst und bisundern gunst und guten willen zuvor, edler herre, gestrenge und ersame weisen, libe bisundern. Als ir uns von der hulffe wegen kegin den vordampten keczern geschriben habet, das habin wir wol vornomen, und thun euch wissin, das wir euch heute bey dem boten, den die von Budissin unserer gnedigen frauen gesant und euern briff in gesant eingeslossin hatten, emboten haben, was ir unserer gnedigen frauen und uns geschriben hettit, das wir das also gerne thun wolden, und wissen anders nicht, denn das sich unser gnediger herre der herzoge zu Sachsen mit seiner macht und wir mit anderen von unserer gnedigen herschafft und unseren wegin mit unserer macht als morne 7. Januar uns erhebin, zu Lichtenaw und da umbe ligin und furder euch zu hulffe kegin den vorgenanten keczern an seumen zuzihen werden, das ir euch darnach wisset zu richten; und hoffen zu gotte, das es allis gut werde. Gegebin zu Dresden am sonnabende der heiligin dreyer konige tage anno et cetera 31.

Heinrich burcgrave zu Meissen herre zu Plauwen et cetera.