Unsern früntlichen dinst zuvor, libin herrn und besundern frunde! Wir sint als hiut by enander gewest, als der seyger achte slugk, ist uns eyn besorgen ingefallin, sint Alsch nach hulffe obir den walt ist, der dy keczer meynen zu beyten, hoffe wyr zu gote, sy kunnen er an der stad myt frommen nicht dyrbeyten, worden sy denne unser macht vornemen. So forchte wyr, sy worden zihen keygen dem Lůban, weren anders dy torme und kloster dorinne nicht wol besaczet und meynten da ere frunde zu beyten. Bytten wir uch, ir wollit da eynen gedangken uff habin und das in uwerm besten gefallin vornemen. Ouch so thun wir uch wyssin, das ich Hanns von Polenczk als morne ryte keygen unserm herrn von Sachsen und dem burggraffen zu Myssin in ere nachtleger by Radeberg nach ere begerunge, und ich habe myne botschafft gehad zu Myssin und zu Dresden, dy ist alreyst kommen, und vorneme anders nicht, denne das sye myt redelicher macht kommen, als ir, ab got wyl, wol sullit gewar werden uff sulche zyt, als wyr zusamptne sullin kommen. Gegebin zu Budyssin am sunabunde in dye epyfanige domini, als der seyger achte slugk uff dy nacht, under mynem Hanns von Polenczk und der stad Budyssin sigel.

Hanns von Polenczk et cetera und rathmanne zu Budissin.