Wir Sigmund, von gotes gnaden Romischer kunig, zu allen zeiten merer des reichs und zu Vngern, zu Behem, Dalmacien, Croacien etc. kunig, bekennen und tun kunt offembar mit disem brief allen den, die in sehen oder horen lesen, daz für uns komen sint der burgermeister, rate und burgere der statt zum Elnbogen, unsere liebe getruen, und baten uns mit demutigem fleisse, daz wir in und irer stat alle und igliche ire privilegia, hantfesten und brieve, die si von dem allerdurchluchtigisten fursten und herren, herren Karlen, Romischem keiser zu allen czeiten merer des reichs und kunige zu Behem, unserm lieben herren und vatter seliger gedechtnusz, und andern unsern vorfarn, kunigen zu Behem uber ire rechte, freiheit, gnaden und gute gewonheit herbracht han, von unserr angebornen gute und miltikeit zu bestetten, zu befestenn und zu confirmirn gnediclich geruchten. Des haben wir angesehen der egenanten unserr burgere zum Elnbogen redliche und fleissige bete und haben ouch betracht geneme dienste und trew, die sy unsern vorfarn kunigen und der cron czu Behem offt und dicke getan haben, uns teglich tun und fürbasz tun sollen und mogen in kunftigen zeiten, und haben in dorumb mit wolbedachtem mute, gutem rate und rechter wissen alle und yegliche ire privilegia, hantfesten und brieve, die si von dem egenanten unserm vatter, keiser Karlen, und andern unsern vorfarn, kunigen zu Behem, uber ire rechte, freiheit, gnade und gute gewonheite redlich herbracht und erworben haben, gnediclich bestetet, befestet und confirmirt, besteten, bevesten und confirmirn in die in kraft disz briefs und kuniglicher maht zu Behem, und meinen, seczen und wollen, daz dieselben ire privilegia, hantfesten und brieve nu furbaszmer in allen iren meynungen, puncten, artikeln und clauseln gleicherweis, als ob sy hyerynne von wort zu worte geschriben stunden, stete, gancz und unverrukt beleiben und gancz krafft und maht haben sollen zu ewigen zeiten von uns, unsern erben und nachkomen kunigen zu Behem und suszt allermenniglich ungehindert. Auch von besundern unsern gnaden durch unsers lanndes und der statt zum Elnbogen nuczes und fromens willen, so erlauben und wollen wir, daz der burggraf zum Elnbogen, der yeczund ist oder zu czeiten sein wirdet, einen landrichter und landschreiber daselbst zum Elnbogen mit wissen und nach rate des rates der statt zum Einbogen, der zu zeiten sein wirdet, als oft des not sein und sich das heischen wirdet, kysen, erwelen und seczen solle und muge, die dem burggrafen und dem rate sweren, daz sy uns, dem lande und der statt zum Elnbogen getrue sein, und unsern frumen, nucz und bestes nach irem vermogen werben und schaden wenden on alles geverde und arglist, als das wol billich und redlich ist. Mit urkund disz briefs versigelt mit unserr kuniglichen maiestat insigel. Geben zu Prag auf dem haws, nach Crists geburt vierczehenhundert iare und dornach in dem czweinczigisten iare, des nechsten dinstags nach sand Margrethen tag, unserr riche des Hungrischen etc. in dem vierunddreissigisten und des Romischen in dem czehenden iaren .