Ich Endirlein Smoyn mit mynen brudern Sdenke und Fredeman zu Walnicz gesessen bekennen in desim unserm offin briffe vor alle den, die en sehn adir horin lesin, das wir los lossen und los und ledig gelossin habin die gestrengin und wolduchtigen Nickel und Heinczen und alle ire gebrudere und ire rechtin erbin und alle ire nochkomelinge aller ansproche, dy wir keyn in gehabit habin, nemlich als von Tucheris wegin; globen wir obgeschrebin Endirleyn, Sdencke, Ffredeman mit unsin erbin und erbnemen die obgeschrebin Nickel, Heinczen und ere gebrudere und ire erbin und erbnemen und ire nochkomelinge nu und nymmer mehr anzusprechin noch anzuredin umb das obgenante gut Tawcheris, sunder wir dorumb ganz und gar vorricht sein, und alle, dy hirynne vordacht synt, nemlich die von Heynersdurff: Nickil, Christoff, Caspar, gebrudere von Gersdurff zu Heynersdorff gesessin. Doby sein gewest der edle her Wentschs von Donyn herre zu Radenbritcz, die gestrengen und woltuchtigin Heinczen von Gersdorff eczwan zu Radinbritcz gesessin, Hanns von Gersdorff zu Pawelsdurff gesessin, Petir von Gersdurff doselbist gesessin, Heincze Czirnhawse, Cristoff Hoeberg zu Wilkaw gesessin. Des zu eynem bekentniss und mehr sicherheit habin wir unser iczlicher sein ingesigil mit guter wissen an desin unssn briff gehangen, der gegebin ist noch Cristi geburt 1434 am nestin dinstage noch sand Jorgentage des heiligen merterers.