Wir Sigmund von gotes gnaden romischer kunig zuallenczyten merer des rychs und zu Ungeren, zu Behem et cetera kunig. Bekennen und tunkunt offembar myt disem brive allen den die in sehen adir horen lesen. Als wir dann dem hochgebornen Ludwigen zum Brige und zu Lignicz, unserm lieben oheymen und fursten, noch seinem weibe zu rechter metegift zu czÿten unser slos, land und stat Trentsch myt allen żugehorungen und herschaften an der summa geldis fur vierczig tausent reynische gulden nach unser brieve laut mechticlich vorphand und vorsatzet hatten und haben. Also haben wir im dovor seynen erben und rechten nochkommen verkawft in eynem namen eynes rechten wedirkawfs unser land und stat Jegerdorff myt allen und iglichen zugehorungen, freyheyten, hirschaften, nuczen und zugefellin, nichts dovon usgenomen, die dovon bekomen mochten, wie man die myt sunderlichen namen benennen mag, ynne zuhaben, zuhalten und zugebruchen fur funf und funfczig tausent guldin reynisch, doran get ab vyer tausent schok, die er von den juden zu Breslaw und Sweydnicz empfangen hat, in aller masse, als wir das selbir von kuniglicher macht ynnehaben halten geniessen und gebruchen, als wir im, seynen erben und nachkomen ouch dovor unser mann und stat doselbst haben lassen hulden und sweren, uncz so lang, das wir unsere erben und rechte nachkomen kunige zu Behem und marggraven zu Marhevren das obgenante land und stat von dem egenanten Ludwigen, seynen erben und rechten nachkomen fur die obgenante summa geldis wider abkawffen und zu uns brengen wollen. Das wir ouch von im, seynen erben und nachkomen an alles geverd ungehyndert bekomen sollen, ydoch unschedlichen dem obgenanten Ludwigen, seynen erben und rechten nachkomen an den czinsen, renten und ufborungen des jares, so wir es von im wider abkewffen wurden. Were auch sache, das der egenante Ludowig adir seyne erben und nachkomen das obgenante land und stat myt aller seyner zugehorunge verkawffen adir verseczen wolde, das mag er adir sie tun fur eyne soliche summa geldis, als wir im das verkawft haben und nicht hoher, doch eynem solichen, dem wir unsers obgenanten landis und stat getrewen mogen, nemlich ausgenomen den nicht zuverkowffen, als das seyn brieff, der doruber geben ist, eigentlich inneheldet. Und wenn wir adir unsere nachkomen dem obgenanten Ludowigen, seynen erben und nachkomen dasselb land und stat Jegerdorf wider abkewffen wollen, so sollen wir dem egenanten Ludwigen, seynen erben und nachkomen myt guten reynischen gulden beczalen adir myt grosschen, als eyn kaufman den gulden von dem andern kaufman nympt und beczalet, doch das uns ye die viertausent schok abgen an der egenante summe, die er dorumb empfangen hat, als vorgescriben stcet, denn so sollen wir im beczalen, der obgenante summe geldis in unsern furstentumen zu Breslaw adir zur Sweidnicz in eyner solichen stat, dovon er seyne erben und rechten nachkomen das obgenante gelt furen mogen, von uns, unsern nachkommen und allen, den unsern gancz ungehyndert und wenn dan sotane beczalunge geschicht, dann so sol der obgenante Ludwig, seyne erben und nachkomen das obgenante land und stat uns unsern erben und nachkomen widerantworten und an alles geverde ungehyndert abtreten. Und were ouch sache, das der obgenante Ludwig, seyne erben und rechte nachkomen umb das obgenante land und stat myt rechte angesprochen wurden, das sollen wir und unsere nachkomen dem obgenanten Ludwigen, seinen erben und nachkomen vertreten und verantworten. Were aber sache, das er myt mechtiger hand angegreyffen wurde, von unsern wegen, also das im adir seynen erben und nachkomen ichts myt gewalt angewunnen wurde, soliches angewynnese schaden sollen und wollen wir sie schadlos halden und solichs schaden gancz benemen. Mit urkunt dicz brieves versigelt myt unserm kuniglichen anhangenden insigel. Geben zu Olomuncz an sant Jorgen tag nach Crists geburt vyerczehenhundert und dornach in dem eynundczwenczigistem jare unserer ryche des ungrischen et cetera in dem xxxv, des romischen in dem eylften und des behemischen in dem ersten jaren.