Nos Sigismundus dei gracia Romanorum rex semper augustus ac Hungarie Bohemie Dalmacie Croacie etc. rex, memorie commendamus tenore presencium significantes quibus expedit universis, quod nos tum ad humillimam suplicacionis instanciam fidelis nostri Gregorii de Zylagh pro parte cuiusdam Urbani familiaris sui per eum nobis allatam, tum eciam consideratis fidelitatibus ac fidelibus serviciis prefati Gregorii de Zylagh et per consequens eiusdem Urbani per eos in certis nostris negociis et arduis agendis, prosperis scilicet et adversis, et signanter pridem in exercitu nostro in regno nostro Bohemie contra Hwzytas tocius katholice fidei persecutores, deoque et hominibus exosos instaurato, culmini nostro regio fideliter et laudabiliter exhibitis et impensis, tum etenim orfaneitatibus nobilium domine Clara condam Georgii dicti Nerges, necnon puellarum Magdalena et Katherina condam Benedicti similiter dicti Nerges, et Elena vocatarum condam Emerici nigri nobilium de Vggyemerow filiarum, hominum scilicet sine heredibus sexus masculini divina disponente gracia de medio aliorum sublatorum, quarum una videlicet Clara predicta, eidem Urbano federe matrimoniali sub ritu romane ecclesie foret copulata, alie vero earumdem nondum aliquibus existerent desponsate, misericorditer compaciendo, ne eedem iuribud seu hereditatibus paternis destitute sub tectis cogantur latitare alienis, easdem ex nostre gracie regie munificencia largifluaque clemencia et gracia speciali in porcionibus earum possessionariis in dicta possessione Vggemerow vocata in comitatu Zaldiensi existenti habitis, que porciones possessionarie eorumdem condam Georgii et Benedicti dictorum Nerges ac Emerici nigri ut prefertur de medio sublatorum prefuissent, et de regni nostri consvetudine ab antiquo approbata ad manus nostras regias forent devolute, in quantum in nobis est et prout de iure admittimur, in veros heredes masculinos et legitimos successores ac filios eorumdem condam Georgii Benedicti et Emerici duximus preficiendas creandas et instituendas, easdemque porciones possessionarias predictum condam Georgium patrem dicte domine Clare concernentes eidem domine Clare, alias vero porciones possessionarias memoratum condam Benedictum dictum Nerges patrem antefatorum puellarum Magdalena et Catherina vocatarum contingentes eisdem Magdalene et Katherine puellis, item porciones possessionarias prefatum condam Emericum nigrum patrem antefate puelle Elena vocata iure hereditario tangentes totaliter in dicta possessione Uggyemerew habitas et existentes eidem Elene puelle ipsarumque domine et puellarum heredibus et posteritatibus universis in perpetuam exnunc ascribimus hereditatem iure perennali ex nostre presentis concessionis annuencia, per eas tenendas, possidendas pariter et habendas, salvo iure alieno, harum nostrarum testimonio literarum. Datum Bude, in festo sancti Stephani prothomartyris, anno domini Millesimo quadringentesimo vigesimo tercio, regnorum nostrorum anno Hungarie etc. XXXVII° Romanorum XIII° et Bohemie quarto.