Unsire willige frundliche dinste zu allir zeit bevor, erzamen, weisen lieben herrn und besundern guten frunde! Wir tun euch zu wissin, das wir also heute kein Jawir komen seint mit unser ganzen macht, und der hochgeborne furste herzog Ludwik uns auch zu hulfe komen ist mit ganzer macht, wenne die boshaftigen und vormaledeiten keczer den Luban gereit gewonnen haben und aus gebrant und das folk dorynne alzumol dirmort. Und wissen andirs nicht, sy seint itczund vor Lemberg adir vor Bunczlau und ir seint bey 14 tusint. Dorume, liben herrn und guten fründe, botten wir euwir erzamkeit dinstlichen mit fleise und durch gotes willen, uns eylende zu hulfe zu komen noch angesichte dis brives bey tage und bey nachte mit euwir ganzen macht, wenne yn dy welde vorhauen seint, das si dir von nicht mogen komen. Und wir hoffen, ab got wil, mit gotes hulfe wir wollen sy nedir legen und wollen, op got wil, gut und ere dirkrigen, wenne uns unsir gnediger herre der bischoff auch nochfolget. Dorome seumet nicht. Das wollen wir umb euch allezeit vordinen. Geben zum Jawir am freitage vor cantate under unsers heuptmans ingesigel, des wir gebruchen.

Albrecht von Coldicz et cetera heuptman, man und stete der furstenthume Sweidnicz und Jawir.