Sigismundus etc. Notum facimus etc., quod pro parte dilectorum nostrorum incolarum et inhabitatorum opidi forensis Rokyczan maiestati nostre supplex oblata peticio continebat, quatenus ipsis infrascriptas duas litteras sive privilegia, unum serenissimi principis domini Wenceslai regis, fratris nostri carissimi, alteram vero venerabilis Sbinconis, quondam archiepiscopi Pragensis, eorum et capituli ecclesie Pragensis sigillis munitas, super eorum iuribus, graciis et libertatibus datas et concessas ac data et concessa, approbare, ratificare, innovare et de innata nobis benignitatis clemencia auctoritate regia Bohemie confirmare graciosius dignaremur. Quarum litterarum sive privilegiorum tenores de verbo ad verbum sequuntur in hec verba:

Wenceslaus dei gracia Romanorum rex oc. judicibus, juratis, consulibus et communitatibus Tachouiensibus, Glathouiensibus, Taustensibus, Misensibus, Veronensibus, viarum custodibus ceterisque, quorum interest, nostris fidelibus vniuersis, graciam regiam et omne bonum. Fideles dilecti! Literis genitoris nostri carissimi diue memorie quondam Karoli, Romanorum imperatoris, necnon fidelium nostrorum relatione veridica didicimus et informati sumus plenarie, qualiter mercimonia et equi, pecora et vniuerse res venales et merces de ciuitatibus vestris et per easdem Pragam transeuntes, ac eciam viceuersa per opidum Rokezanum antiqua et approbata consuetudine et non aliunde transire debeant quoquomodo. Quare vobis omnibus et vestrum cuilibet presentibus seriosius iniungimus et mandamus, quatenus in ciuitatibus vestris ac eciam locis oportunis diebus forensibus voce preconia proclamari publice faciatis, nostro nomine firmiter iniungendo, ut omnes aurige, vectores et alii, quicunque mercemonia, equos et pecora seu res alias venales quascunque ducentes, exnunc et inantea imperpetuum et per opidum Rokeczana predictum et non aliunde transire presumant seu debeant quouis modo; nam secus facientes per officiales venerabilis Johannis Pragensis archiepiscopi, principis, cancellarii et consiliarii deuoti nostri dilecti, ex potestate nostra, ipsis super eo tradita, ad execucionem premissorum compelli debent et arceri arrestacionibus, impignoracionibus et aliis viis et remediis oportunis; nullam in premissis commissuri negligenciam, sicut indignacionem nostram grauissimam volueritis euitare. Presencium oc. maiestatis oc. Datum Piesce anno domini M°CCC° octuagesimo primo, die XXVII. Nouembris, regnorum nostrorum anno Bohemie XIX°, Romanorum vero VI°.5

CIM II, s. 738–739, č. 579.

Svinco, dei gracia sancte Pragensis ecclesie archiepiscopus [apostolice sedis legatus. — Sane in nostra presencia constituti prouidi incole opidi nostri forensis in Rokyczan, fideles nostri dilecti, nobis exponere curauerunt, qualiter ipsi nulla munimenta nec priuilegia super ipsorum juribus et libertatibus hucusque habuerint. — Nos vero — in prefatos incolas predicti nostri opidi mentis nostre aciem vice reciproca dirigentes ipsis, heredibus et successoribus eorum gracias facimus infrascriptas, videlicet, quod omnes domos, agros cultos et incultos, riuulum, qui fluit per compita a villa dicta Rakowa, prata, rubeta et communitates, ad prefatum oppidum ab antiquo spectantes, prout in suis metis et terminis sunt situata et prout ipsi ea hactenus tenuerunt, concessimus, innouauimus et confirmauimus, concedimus, innouamus et uirtute presencium de certa sciencia confirmamus per ipsos, heredes et successores eorum tenenda, habenda et perpetuis temporibus sub infrascriptis condicionibus libere, quiete et pacifice possidenda: Primo, quod predicti incole nobis et successoribus nostris septuaginta nouem sexagenas et quadraginta octo grossos denariorum pragensium diuisim, scilicet in festo sancti Georgii quadraginta sexagenas minus sex grossis et in festo sancti Galli totidem, annis singulis censuare perpetue tenebuntur, prout easdem hereditates seu agros, domos, riuulum, prata, rubeta et communitates ad prefatum opidum ab antiquo spectantes, sub eisdem censibus a retroactis temporibus possiderunt. Item racione fumalium duas sexagenas et decem et octo grossos circa festum sancti Galli, item sex sexagenas grossorum singulis annis nobis, successoribus nostris aut pro tempore purgrauio existenti soluere tenebuntur. Quin quidem burgrauius duos vigiles pro predictis sex sexagenis gr. in sua cura tenere debebit, quandocunque per nos aut successores nostros super hoc requisitus fuerit et quocienscunque nobis aut successoribus nostris videbitur oportunum. Item de qualibet thaberna, quotquot ibidem habentur vel in posterum habebuntur, nobis et successoribus nostris sedecim grossi super festo sancti Martini anno quolibet persoluentur. Item de singulis maccellis carnium, quotquot ibidem sunt vel pro tempore erunt, de quolibet maccello unus lapis sepi colati pro nostra camera archiepiscopali similiter circa festum sancti Martini annis singulis persoluentur. Item medonem nobis et thesaurio curie nostre archiepiscopalis Pragensis, prout antiquitus soluere consueuerunt, in predicta nostra curia Pragensi annis singulis representent et reponant. Et quia ibidem sunt plura molendina, quedam maiorem et alta minorem censum et annonas solvencia, volumus igitur, vt predictorum molendinorum quodlibet secundum plus et minus annis singulis censuet, sicuti hactenus censuare consueuerunt, prout census huiusmodi cum oneribus singulorum in registris camere nostre plenius describuntur. Item quilibet hospes ibidem ad requisicionem burgrauii pro tempore existentis semel in quolibet anno tenebitur ad venacionem transire vel alium loco sui dirigere vel medium grossum prefato burgrauio assignare. Item tenebuntur ligna de siluis nostris ibidem ad Rokyczanum spectantibus pro calefaccione stubarum et pro coquina ibidem adducere, quantum fuerit oportunum. Insuper generalem bernam regalem, quando proclamata fuerit, sicut ab antiquis temporibus soluere tenebuntur. Quibus censibus et oneribus, sicut premittitur, expletis, prenominati incole, heredes et successores ipsorum nobis et successoribus nostris ad nullas alias exacciones seu onera amplius tenebuntur, ceteris tamen nostris et subcamerariatus archiepiscopatus nostri Pragensis iuribus, preter super enumerata iura et onera, per omnia semper saluis, signanter tamen judicium ibidem in Rokyczan cum omnibus suis utilitatibus et pertinenciis pro nobis et nostris successoribus reseruamus. Et vt prefate incole per nos se senciant vberius consolatos, ipsis, heredibus ac successoribus eorum hanc graciam facimus specialem, quod ipsi in causis judiciariis adinstar Maioris ciuitatis Pragensis consuetudinem obseruare debebunt perpetuis temporibus et habere, ac ad predictam ciuitatem Pragensem super dubiis et sentenciis diffiniendis recursum habere et appellare, quociens ipsis et cuilibet grauatum se estimanti uidebitur oportunum. Si autem etc. Konec této listiny slovně souhlasí s koncem předcházejícího listu daného městu Pelhřimovu CIM II, s. 1042–1043, č. 804. — Datum Prage in capitulo generali anno domini millesimo quadringentesimo sexto, die secunda mensis Octobris.]6

CIM II, s. 1051–1053, č. 805.

Nos huiusmodi supplicacionibus, utpote iustis et racionabilibus, benigniter inclinati, consideratis attente multiplicibus probitatum meritis, quibus predictorum incolarum Rokiczan predecessores nostris predecessoribus regibus Bohemie et archiepiscopis Pragensibus eciam placuerunt etc., ipsis incolis et eorum successoribus supradictas duas litteras et omnia in eisdem contenta, prout de verbo ad verbum expressantur superius, approbavimus, innovavimus, ratificavimus et confirmavimus graciose, approbamus, innovamus, ratificamus et tenore presencium auctoritate regia Bohemie benignius confirmamus; decernentes etc. Insuper supradictis incolis in Rokiczan auctoritate regia Bohemie predicta facultatem et potestatem plenariam damus per presentes, ut ipsi iudicem ydoneum et ad hoc habilem, qui ipsis utilis fuerit, ex ipsis exnunc in antea futuris temporibus eligere et constituere possint et valeant sine impedimento alicuius tociens, quociens ipsis expedire videbitur; iuribus tamen archiepiscopi et ecclesie Pragensis et aliorum quorumcunque in predictis omnibus semper salvis. Nulli ergo omnino hominum etc. Presencium etc. maiestas. Datum Prage, die VII. februarii anno etc. XXXVII.