Wegen der in jueden schulden.1

Nadepsáno pozdější rukou.

Nach Crists gepurde vierczehenhundert und dornach in dem dreissigisten jar haben wir burgermeister, ratmannen und gesworn schopfen der stat Olomuncz gemerkt und angesehen manicherlai saumpnuss, gebrechen, stoss und zwitrachten, die zwisschen den kristen an einem und den juden zu uns am andern teilen gescheen sein von sulicher sachen wegen, so sie miteinander umb geltschult, umb gesuch und umb pfantversetczung zuschaffen und sich miteinander angelangt haben. Dovon so haben wir mit willen, wissen und gutem rate unser eldern durch fleissiger gebete, domit uns die juden stetes angelegen sein, zu understeen sulchen obgemelten saumlikeiten und gebrechen bestalt und machen lassen zwai registr, eins, das der foite stetes bai im haben und dorein schreiben ǁ fol. 20r lassen sol, was vor im umb schult bai zwain marken und dorunder, die vor im bekant wirt, wirdet zwischen cristen und juden gehandelt. Awr das ander register sal stetes in einer lade iczum foit verslossen ligen. Dovon ein gesworner des rates, der dorczu benůmet ist, den slussel haben. Und alweg dobai sein sal, wann man ichtes dorein sachen, die sich zwisschen kristen und juden vor in handeln und der bekant wirt, schreibet umb geltschult, die do zwu mark und hinuber wievil das ist, bedeutet und wir biten all unsere nachkomen burgermeister, ratmannen und gesworn der stat umb gotes und der selen selikeit willen, diese unsere machung nicht zuvor anderwerten, es sei dann, das man des ein bessere ordenung ader bestellung machen möchte, das die armut von juden nicht gedrůcket werde. Actum sub Johanne Vorlauf, magistro civium, Michaele Czotlino, Petrlino Hufnagl, Stephano gurtler, consulibus, ceterisque iuratis.