Sentencia inter Petrum von der Linden et Gril et uxorem eius de Lincza

Wir Michel Twaroze, purgermaistr, Johan Melczner, Andre Per, Niklas Schutter, Jacob Beran, Hannus Mondl, Jan Wollcher, Hannus Haller, Johannes Parwule, Sigmund Czinczlicht, Thoman Fruauff und andre gesworn zu Budwais tun kund mit dies schrifft, daz nach datum daz verschribenen zwoyer jar vergangen, daz ist gewest da man zalt hat nach Krist gepuerd XIIII^C jar und narnach in dem XXXV jare, ist Hanns Gril, purger von Lincz, und Margareth sein hausfraw, des Hansen Sparnkhes selign tochter etczwen unsers mitburgers, furgetreten in gehegtem taiding und haben beklagt den Peter von der Linden, des benanten Sparnkhes prueder, um yeres veterleichen erbtailes wegen. Und also habn wir unser statpuecher lassen lesen, darynn verschribn ist, daz das gueth und hab, die der Sparnkhes lassen hat, ist durch frum leut unsr mitburger beschawt und beschaczt worden in solicher masse, daz der hab nicht so vil ist gewest alz die schuld der schuldiger sich ausgeweist hat und die der benante Sparnkhäs schuldig beliben ist und dath sich der Petre nach solicher schaczungk underwund hat und auch die geltschuld davon ausrichten schol. Auch so ist dem Peter und seinem vater dem Merth von der Linden des Sparnkhes geschaft auch bevolhn worden, mitsambt den chindern und waisen mit dem gescheft und khindern ganczen gwalt habn ze tun und zu lassen; also nach solicher emphelhung und verschreibung in unsern puechern habn wir nit urteil gesprochen, daz in der Petre nicht verrer phlichtig schol sein zu antworten, sunder er schol und sein erben ein beruebter man sein. Da entgegen Hanns Grill und sein hawsfraw sich dez verrer verueft und gedingt gen Prag, daz er nit recht und also wider unser statpuecher nicht macht getun, und also da verrueft er sich der verrer in unsers herrn gnad herczog Albrechten von Ostereich etc. Und dasselbe hab wir im lassen volgen, daz er also auf sein gnad oder seinen anwald scholt verpuergen, des der Gril und sein hausfraw nicht tun hat wellen, und yecz hat des benanten Grillen hasfraw beklagt den benanten Petre vor dez benannten gnad ze Prag und der uns also verrer verschriben hat, daz wir ir rechten scholten helffen zu dem Petre. Und also haben wir obgeschriben scheppfen alle sach und verschreibung vleisigkleich besehen und daz also in unserm rate gewegen und habn daz benante urtail, daz vormalen beschehen ist, bestetigt. Und daz ist geschehn nach Crist gepuerd XIIII^C jare und darnach in dem XXXVII jare der vreitags vor dem vaschangkh.