Sigismundus, dei gracia Romanorum imperator semper augustus ac Hungarie, Bohemie etc. rex, universis ac singulis baronibus, nobilibus, militibus, clientibus, burggraviis, castellanis, officialibus civitatum, opidorum, villarum et locorum communitatibus et rectoribus eorumdem ceterisque nostris et regni nostri Bohemie subditis et fidelibus dilectis, qui presentibus requisiti fuerint, graciam cesaream et omne bonum. Nobiles, strenui, providi et fideles dilecti! Licet edictum sit et generaliter mandatum, ut blada, frumenta et fruges cetere extra regnum Bohemie non educantur, tamen considerantes fidelitatem civium de Egra, fidelium nostrorum dilectorum, nolumus, ut huiusmodi edictum eos comprehendat, quoniam ipsi, qui nobis et corone nostre Bohemie subditi sunt et obedientes, nec unquam aliquo impulsu, guerris nec invasionibus potuerunt a devocione regni Bohemie removeri, merito a nobis ac corona et a vobis omnibus debent reciprocum beneficium reportare, ut, qui in adversis semper fuerunt participes, eciam in prosperis sint consortes. Idcirco tribuentes tenore presencium plenariam facultatem omnibus hiis, qui ad civitatem Egrensem et territorium eorum blada, frumenta ac fruges cuiuscumque materiei extra Bohemiam eduxerint, vobis omnibus et cuilibet vestrum strictissime precipiendo mandamus, quatinus huiusmodi eductionem ad Egram nequaquam prohibeatis, sed quoscumque homines ipsis adducere volentes promoveatis favoribus et promocionibus oportunis, in eo nobis singularem complacenciam facientes. Preterea, quia vobis clare constat, qualiter prefata civitas et territorium Egrense et eorum incole multipliciter tam ab incolis regni Bohemie, quam exteris et forensibus in dies iniuste damnificantur et molestantur, quod displicenter percipimus, volentes igitur ipsos speciali nostra et regni nostri Bohemie, prout dignum est, tutela et protectione gaudere, vobis omnibus et singulis firmissime precipiendo mandamus et sub obtentu gracie nostre habere volumus, ut nullus vestrum quoscumque suos familiares permittat Egrensibus qualitercumque damna inferre, sed pocius, quandocumque ipsi Egrenses vos et quemlibet vestrum invocandos duxerint, ipsos nostro et regni nostri nomine omni posse vestro defendatis, protegatis et favores ac subsidia vestra omni posse impendatis, sic agentes, ut vobis teneamur ad reciprocam recompensam et prefati Egrenses, qui tanta constancia corone Bohemie adheserunt, in fidelitate eiusdem forcius animentur. Presencium sub nostri imperialis sigilli appensione testimonio litterarum. Datum Prage anno Domini millesimo quadringentesimo tricesimo septimo, in octava sancte Agnetis virginis et martiris, regnorum nostrorum anno Hungarie etc. quinquagesimo, Romanorum vigesimo septimo, Bohemie decimo septimo, imperii vero quarto.