Unser gebet zuvor, liben herrn und frunth! Wir lassen euch wissen, das uns potschaft komen ist nechten und heutt, wie die hussen ye heraus wollen und sein dennoch gestern zu der Topel gelegen und sey nymants fremdes zu Tachaw; so sein sy noch auch nicht uberigs starck, denn in kom noch mer folks, denn wer wir innen, das sy dofur uns herauss czihen, das well wir euch pey tag und nacht wissen lassen. Des gelich weger wir von euch auch. Geben zu Valkenberg des ersten Sunabencz nach Kyliani anno domini et cetera XXVIIII°.