Am sonnobende noch Johannis Baptiste seint vor uns komen dise hernochgeschribne erbirre leute, unsere meteburger Hanus Newmeister, Heinrich Tschirwicz und Petir Feigenstein an eyme, Jost Burgraff, Caspar Smidel von Eger und Niclas Slonecz von Pilsen am andirn teile, und haben eintrechticlichen becant, wy das sy eine fruntliche gancze sune und entscheit gemacht haben czwischen Ludwigis Falkenauwirs kinder, eczwen burgers czu Prage, dem Got gnade, nemlichen Jacoben, Sebolden und Barbaren irer swestir an eyme, und czwischin Petir Geyern von seines bruders Paul Ffalkenawirs zeligen kinder wegen, nemlichen Georgen und Hanuschen am andirn teile, also vornemlichin, das der obgenanten Barbaren folgen sal irer mutter roter mantel. So sal man ouch den obgenanten Ludwigs kinden den dreyen geben III guldynne ringe, nicht di besten und ouch nicht di argisten, dorczu den cleynen silberynen gürtil, ein silberyn bechir und di perlin. So sal Petir Geyers bruder kinden den obgenanten czweyen Jürgen und Hannuschen folgen, was oberigs silberyn geretis und von golde do ist, adir sust an paren gelde ader an schülde, und ein corellen paternoster, dorczu czwey bette, di bestin. Und was denne oberigen hausgeretis und hausgewandis do ist, das sal man teilen in czwey teil, halp den dreyen kinden Ludwigis Falkenauwirs, und halp den czweien kinden Pauls Falknauwirs. Ouch haben beide teil sulchen entscheit vor uns globt stete, gancz und unvorbruchlich czu halden und eynandir der sachin ümb keynerley nu noch nymmer mer anczusprechin noch anczuteidingen geistlich noch wertlich noch in keinerweize.