Ego Jakubko de Vrzesovicz, tunc temporis residens in Bielina, recongnosco presentibus coram universis, quod matura prehabita deliberacione dilectis ac fidelibus civibus meis Bielinensibus intra murum et extra murum residentibus ipsorumque heredibus et successoribus hanc specialem graciam duxi faciendam, videlicet quod universa ipsorum bona tam mobilia quam immobilia exhereditari non debeant nec talia bona per mortem ipsorum alterum ad me neque ad heredes meos seu successores meos devolvantur, sed si quempiam ex dictis meis civibus decedere contigerit, extunc universa bona ipsius tam mobilia quam immobilia ad propinquiorem consanguineum usque ad septimam lineam debent devolvi omni sine impedimento, et hoc ubicunque talis consanguineus locorum, sive in mea pretacta civitate intra ac extra murum seu in quacumque alia civitate, opido aut villa vel alio quocumque loco intra vel extra terram Bohemie moram traxerit sive mansione fuerit constitutus, tali condicione adiuncta, quod talium bonorum repetitor lineam consanguineitatis predictam met septimus cum testimonio proborum hominum utriusque sexus debet comprobare, promittens contra ipsam graciam nunquam venire per me aut aliam personam interpositam aliqua racione sive causa, sed eam ratam et gratam habere volo et servare. Ne eciam cuique meorum heredum et successorum hanc graciam liceat immutare, presentes literas scribere feci et sigillo meo ac sigillo testium infrascriptorum munimine roborari. Data sunt hec in Bielina sub anno Domini millesimo quadringentesimo vicesimo octavo in die Jacobi apostoli Maioris. Testes vero huius rei sunt famosi Venceslaus de Wsseborzicz, dictus Buben, Dobessius de Wchynicz, tunc temporis castellanus castri Bielinensis, Johannes dictus Hradek de Chodzov, residens in Hradisst, Hron de Hradek et alii quam plures fide digni.