Wir die Manschaft gemeinclich in Elboger Kreiss und Rat czum Elbogen bekennen offenlich und tun kunt mit disem briue allermeniclichen, also als Ir erbern weisen Burgermeister und Rate czu Eger die Summe der Kunigstewr, die wir bey euch eingelegt haben, damite uns unser gnedigister Herre der Kunig begnadt hat, und diselben Kunigstewr von sunderlichen vnsers gnedigisten Herren Kunigs geheisse unsern freunden von vnsern wegen nu widerkeret und aus ewr gewalt gegeben habet, umb die egenant Kunigstewr sagen wir euch qwit, ledig und loz mit craft diss briues, des czu warem bekentnusse geben wir euch disen offen briue vorsigelt mit der Stat czum Elbogen aufgedruckten Secret, und Niclas Czwertengruners Insigel, der wir obgenannten die andern gemeinclich in dem briue auch gebrauchen, der geben ist nach Crists geburt virzcehenhundert Jare und darnach in dem dreyundezwenczigistem Jare am nesten Freitage vor dem Suntage Judica in der Fasten.