Anno domini M^o CCCC^o XX. Von Wynichschers unn syns wybes unn der kirchin wesin wegnn unn des selbigin czins.

Wir Jocoff Pedig, foyt zcu sulchin geczeytin, unnd Hekel, burgermeyster da ys geschach von begynnis, dor noch Michel Wynichscher burgermeyster, do ys geschriben wart, unnd dy gemeyne der scheppffin Jacoff Vleychscher, Hentschel Woyner, Cunat Knoblauch, Peter Snyder, Kunel Blor, Heynrich Stubus, Jacoff Stelcer, Dytherich Phefferkorn, Hannus Yekel, Nyclaus der stadschriber, scheppffin zcu sulchin geczietin, bekennen unnd thun kund indesem stadbuche, do dy ding crafft unn macht habit, das Michel Wynichscher dy wese obin in dem dorffe nedewing Pacczinhewer uff ztwene lybe uff sich unn syn weyp gedingket hat, dy der kirchin yst, in sulchem underscheyde, wyle her unn syne fraue Anna lebet, der zcu genyssin ungehindert unn gedrungen, alzo daz her ummb dy gewisheyt des genys der selbigin wesin her gybet unn ggebin hat IIII schog groschen ane XVIII groschen unn sal yerlichin kirchin czins dor von gebnn der kirchin uff sindti Jorgin tag XXVIII groschen unn Patczinheuern eyn yar czins gebin XVIII hellet. Unn do got vor sy, wenn sy ab ggehin, dy beyde luthe Michel Wynichscher unn Anna, zo sal dy wese fry unn ledig sein mit allin genyssin, alz vor vor alders gelegin ist mit czinsin unn genyssin, dy kirchin vorweser, do mytte zcu thun uff beste unn dy burger. Scriptum anno domini M°CCCC°XX° dominica proxima post Viti.