Senatus Golricensis den gestrengen und woltüchtigen herrn Hartung Cluks ritter zu Schochaw gesessin, Voitlendern von Gerissdorff, Jonen von der Kempnitz und andern unsirs allirgnedigsten herr des Romische et cetera koniges mann des landes zu Gorlitz, die uff dem tage zur Lobaw bey andern landen und stetin sein werden, unsern gunstigen lieben fründen.

Als uch denne wissintlich ist, wie wir allhie zu Görlitz abgescheiden sein, das wir bey andern landen und steten zur Lobaw als morne 24. Januar zu tage suldin gewest sein als von des hausis wegin Oywin: also thun wir uch zu wissen, das wir gewarnet sein, wie man uff die unsern, die zu demselbin tage reithin sulden, meynet zu halden, und solche botschafft uns so spette kommen ist, das wir uch das so balde nicht kundenzu wissen thun, domethe wir verhindert sein, das wir die unsern zu dem tage nicht haben mögin gesendin.

Wenn sundir nach sulchem abescheiden et cetera mag landen und steten das haus einwerden, so habit ir unser gantze macht, das methe einzunemen et cetera. Und dorumb so bitten wir euch et cetera solche sachen uff das beste vorzunemen, uns dorinne nicht zu vormercken et cetera. Geben zu Gorlitz am montage vor sand Paulitage conversionis.