Friderich und Sigmund gebrudere von gots gnaden herczogin zu Sachzen.

Liben getruwen. Wir sint eigintlichin bericht, wie das die vordampten kecczer gar vil kuntschafft mit heimlichen boten in unsern landen ußrichten und nemlichin iczund eyn bote zcu Sacz sy, der sich hute irhebin und heruß in unsire lande noch kuntschafft gehin solle, derselbe bote yn vor vil heymlichir kuntschafft ußgerichtet habe und iczunt abit ußrichten solle, davon uns und unsern landen groß schade entstehin mochte. So sint wir ouch bericht, wy das derselbe bote eyne blahe kogil uff habe und zcwu hosen an, ayne swarcze und eyne wisse under den knyen gebunden, und habe syne brieve in der jopen zcwisschen den schuldern und sy ouch, als wir berichtet synt, eyn goumelman, so das ers den luten mit wunderlichin und gemlichin reden vorwildern kan, das man nichtachtunge sere off yn habe. Davon begern wir von uch mit flisse, das ir uff dy strassen von stund bestellit und ouch an den torn tag und nacht daruff sehin und achtunge habin lasset, ab man den ankomen und begriffen moge, wanne das uns, unsern lande und uch grossen fromen brengin wurde, dorumbe syt daran flissig und bestellit ouch, das das heymlichen gehalden werde. Daran tut ir uns wol czu dancke. Gegeben zcu Rochlicz am sonabinde noch Margarethe anno etc. tricesimo.