Der almechtige gütige goth geruch euch zu offenbaren seinen heiligen willen und gebe euch zu derkennen seine heilige satzunge, darinne ir möchtet wandern und dornach zu dem ewigen leben mitsampt uns komen. Amen. Durchlüchtiger fürste und hochgeporner herr! Ewer durchleuchtigkeit embieten wir unsern dinst williclichen zuvor.

Ewren brieff, in dem ewer durchleuchtigkeyt dem lande zu Beheym und uns etliche bosliche, schemliche dinck und irrunge zuschreibet, haben wir wol vernomen. Also antworten wir ewer durchleuchtigkeit daruff, das wir in sulchen böslichen, schemlichen dingen noch irrungen, ab got wil, nicht sein, noch in zukunftigen zeiten erfunden werden. Und were es nu, ab yemant uns schulche schemliche oder irrselige dinck zuschreib, des wolden wir uns, ab got wil, rechtfertigen und vorantworten, wenn stad und weil wer, als frome lewte. Auch ewer durchluchtigkeit schreibet, wie ir ein ganzen fleisse und zunegunge habet zu deme, was gotliche und erliche und nuczbarliche diesem lande und deren cron zu Behem were, das sein wir zu male ser dankbar von ewre gnaden. Und umb die andern sachen, als ewr durchluchtigkeit schreibet, wollen wir mit den lanthern, rittern, stetten, gemeinschaften und knechten in dem lande zu Behem ustragen ane sewmpnusse und ewer durchleuchtigkeit unsere antwort, des schirste wir mögen, werden daruff geben wollen. Gelawbende und getrewende, ewer durchleuchtigkeit wert den unruigen, hochfertigen und unkeuschen pfaffen in der weil nicht gelawben, ist, das si uns icht boser, irrsaliger oder schemlicher dinge wollden zuschreiben und nochsagen. Wann wir widder die erste heilige kirche nicht sind, noch meinen, ab got will, zu sein, sunder der nochvolgen noch unsern vermugen, noch dem und der herre Cristus Jesus aufgesatzt hat, die lieben heiligen czwelffboten gefurt, und die lieben heiligen lerer mit andern heiligen gehalden haben, als wir dann ewer durchleuchtigkeit darnach mit unseren brieffe vollkomlichen werden underweisen. Geben am montage vor Kyliani anno vicesimo septimo.

Bürgermeister und rath und die gemeine der stat zu Saz.