Wir Sigmund von Gotsgnaden et cetera vnd wir Johann von denselben gnaden Bischoff czu Olomucz, Przemko auch von Gotsgnaden Herczog czu Troppaw, und wir Wilhelm von Bernsteyn howptmann der Marggrafschaft czu Merhern, Johan von Lomenicz, Peter von Crawarn, Andres von Streznicz vnd ander herrn hiernochgenant et cetera. Bekennen mit dysem briffe daz wir durch zelykeit vnser zelin durch gemenes besten durch vredes willen dises landes, durch ordenunge willen des landes czu Merhern, die in vil stucken vaste undergedruckt sein und och durch armer lewte willin diz landes die vaste betrubet worden sein bis uff dize czeit uns alle geeynet haben, unde einen lantfrede gemacht und machen in crafft diz brives alz hinden noch geschriben stet. Czum irsten sein wir doruff bliben daz ausgeruffen werden zal in des Konegs steten in des Bischofs und der lantherren czu Merhern Stete, das alle herren, Ritter vnd Knechte, Burger vnd gemeine leute vnd geistliche die die fyer stucke vnd ander yrresal. artikel. gefurt vnd gehalden haben vnd noch halden wider die heilige cristenheit vnd die noch czu busse dorumb komen sein, Daz die alle dez alczuhand nymmer halden, davon offezuhorn vnd sante Thomas tag des heiligen Aposteln der schirste kompt czu bussen vnd czu eben dinger komen kegen Olomucz kegen Brunnen kegen Snayme ader kegen Troppaw, wo es iglichim am nechsten gelegin ist, vnd do busse entphan von den pristern die do czu gesaczt werden noch ordenung der Romeschen Kirchin, ausgenomen die sich uffentlich durch der stucke willen wider die heilige Kirche vnd des Kunigs genade setczen die selben keynen tag noch vorlengunge haben, es were denne daz sy sich sunderlich mit des Kunigs gnade eyneten, were ader daz ymand aus der vorgenanten ordenungen nicht wölde czu der vorgenanten bichte vnd czu busse komen in der obgenanten czeit So sullen vnd globen wir vorschriben alle die selben anczugreiffen an leybe vnd an gute vnd an yn czurechen daz vorbas sulche vnordenunge vnd vngehorsamkeyt von yn nymmermer von yn begangen werden. Item geschee ymmermer daz ymand yn dem lande czu Merhern sich vfwurffe wider die aussaczunge der heiligen Cristenheit vnd Romischer Kirchen vnd hilde schriffte, die von der heiligen cristenheit vnd der Romischen Kirchen vordammet ist vnd vorwurffen vnd nemlich die fier stucke die do vorgestanden sein, wider die selben sullen vnd globen wir vns alle enander czu helfen vnd die czu werin vnd endlich vnderdrucken vnd an deme ader den die sie halden wurden czu rechen an yren leyben vnd guttern als wffte daz not sein wyrdet daz vorbas sulche vnordenunge vnder vns nymmer vfersteen. Item zo sullen alle vnd igliche yn der Marggrafschaft czu Merhern gesessen sie sein geistlich ader werdlich bey yrem rechte ordenunge fride rechtuertikeiten vnd freiheiten bliben daz die geistlichen den wertlichin yn ire recht nicht greiffen vnd des glichen wider daz die wertlichen den geistlichen yn ire recht nicht greiffen, Sunder daz igliche teyl bey seinen rechten freyheiten vnd wirdekeiten bleiben alz daz von alders vsgesaczt vnd geordent ist, vnd daz och ein iglicher sein recht suche doselbist, ader czu welchem rechte her gehört, were ader daz ymant icht gebreche aus dem lande, der sal daz brengen an des Kunigs gnade an den Bischof an den Houptmann vnd an die Herren von Merhern daz ym ein geliches wyderfare, möchte ader ym keyn geleichs wyderfaren noch demselben vnsern enmanungen so sal ym der Konig der Bischof der Hoptman vnd die Merhrischen herrin ratten vnd helffen daz ym ein gleychs widerfare vnde was er aus dem lande vorbas tete do mitte hat her den lantfrede nicht gebrochen, were ader daz ymand dorobyr hinderunge tete vnd dem rechten nicht genuk haben wolde, daz selbe hat ym vor ein vnrechte czugeczogen werden vnd der kunig der hoptman mit allen herren sullen czu demselbin richten als czu einem vnrechten manne vnd einem lande vorterber. Item es sal ausgeruffen werden in allen Steten in Merhern sie sein des Kunigs des Bischofs ader der Herren von Merhern woe man ymandes ankompt der daz land rawbet ader heret ader kenerley gewalt vf der Strassen ymand tete geistlich ader wertlich daz man czu dem selbegen richtet alz czu einem vorterber des landes. Item wurde in dem lande icht geraubet ader genomen das desselben guttes nymant kauffe wider in den Steten noch in den Dorffern, wurde ader ymandes des selben gutes ichts kouffen daz sal her umbzust wider gebin vnd sehen, her sal ouch dorumb czu ym richten. Item wer dy werin dy do legen in Steten ader in Dorffern vnd nicht herrin hetten vnd suchten williglich der leute vngelucke, daz man die vfhalde vnd fohe alz die bozen leute. Item wer die weren die dieselben vfhilden dye daz land beschedigten vnd die von dem Kunige von dem hoptman ader von den herren des ermanet wurden das her dy selben Rowber vorbas nicht vfhalde, vnd tete her daz selbe nicht Ist her denn eyn herre ader eyn edel man daz denn der herre ader der edel man von seinem state ader wirdekeit gefallen sey, vnd sein recht daz einem herrin ader edel manne czugehoret vorlorn haben vnd dor czu daz man czu ym richtet alz czu bozen leuten. Item so sullen alle strosen frei sein daz arme vnd reiche doruffe faren reiten vnd geen mogen vnd ire notdorfft suchen an allen schaden vnd daz och nijmandes durch keinerley vngunst willen uf der Strassen ymands hindern wer ader dorober tete dem sal man daz vor eyn deubrey rechen vnd czu ym richten. Item wurde ymand rawben ader nemen ichts rowblich vff der strassen ader anderswoe daz were yn dem lande vnd eyn geschrey noch ym wurde ader nicht wurde wo sich der selbe hin keret vf welche Slosser, festen ader Stat mit dem selben rawbe ader mit dem daz her genomen hat, woe her mit demselben gefonden wirdet ys sei eyner ader mehr so sullen die den daz ire genomen ist daz selbe fordern daz dasselbe heraws gegeben werde vnd die selbin die daz getan habin sullen gefangen vnd obir sie gerichtet werden als boze leute angehoret an der Stat do man sie findet, wolden aber des Kunigs ader des hoptmans Amechtlewte dy selben vorsuchen ader martern der worten daz sie der bozen leute mehr erfuren, daz sal Im der gunnen des daz haws, feste ader Stat ist, were ader daz der selbe des daz haws, feste ader Stat is daz man die selbin ader der daz gut ist daz genomen wurden ist nicht heraws gebin wolde noch obir sie richten noch sie martern lassen, der sal aus geschregin vnd ausgeruffet werden vnd man sal uber yn richten alz obir einen bozen man. Item wurd yndert eyn haws Stat ader feste in keine eyniger wege vorlorn sey, sie sein des Kunigs des Bischofs ader der herren ader ander landleute czu Merhern. So sullen czu handt der Kunig der Bischoff der hoptman wolden sie selbes nicht do sein so sullin sie dar schicken ire Amechtleute ader ire macht vnd alle ire herren der Ingesigel an disem briue hangen sullen belegen daz haws Stat ader feste, ader ire macht darczu schicken vnd daz ys gewunnen wirdt vf des Kunigs koste, die do gewonlich ist vf pherde vnd och vf lewte wirdt ir der Kunig dar czu bedurffen vnd sullen ouch nicht von dannen rucken ys sey denn gewonnen ader als lange daz dem Kunige dem houptmanne vnd dem herren czemlich vnd gut dunket vnd wenne man daz gewynnet. So sal man ys dem selbin des es gewest ist abetreten. Item rowbet ymand von seynem egin hawse Stat ader feste ader Rowber doruffe hilde. So sullen der Kunig der Bischof der houptman wolden sie selbes nicht do sein ire macht dar schicken vnd die herren die geschreben sein in dysem brive alz vorberuret ist, Sullen daz haws Stat ader festen ane vorczyhen belegin, ader ire macht do hin schicken vnd den selben herren vnd iren lewten vnd pferdeu sal der kunig gewonlich kost gebin, wirt her yr dorczu bedurffen werden, vnd von dannen sullen sie nicht czyhen es sey denn daz selbe haws Stat ader feste gewunnen ader als lange dem Konig dem houptmann vnd den herren czemlich bedunken wirdet, vnd wenne daz selbe haws Stat ader feste gewonnen wird dy sullen gefallen an vnsers herren des Kunigs gnade, derselbe mag ouch mit demselben haws Stat ader feste thun was sein gnade geruchet als ein herre des landes, were ader daz selbe haws Stat vnd feste Manschaft ader lehen were des Kunigs des Bischofs ader eines andern herren des Sigel an dysem briue henget. So sal der Kunig den herren vnd iren lewten vnd pferden gewonlich koste gebin, wirt her yr bedurffen werden, vnd och den geczewg der czu gewynnunge der Slosser gehoret sal der Kunig ouch dar czu gebin, vnd wen alzo das haws Stat ader feste gewynnet So sal der Kunig dasselbe wider faren lassen des Manschaft ys ist. Item were yndert eyn herre Ritter ader Knecht in dysem Lande alhy gesessen, der mit des Kunigs gnade, mit dem Bischoffe mit dem houptmanne ader mit den herren in diser vorschr. nicht sein wert, vnd der awssaczunge vnd ordenunge nicht halden wölde und wolde ouch obir dise vorschribunge in dem lande schaden ader czweytracht thun vnd offbrengen der sal seines herlichen rechten vorfallen sein vnd die herren sullen yn auch nymmer vortreten noch vorantworten sunder her sal ane ere sein vnd woe man yn dirgreiffet so sal man czu ym richten alz czu eyme bozen manne vnd vnser herre der Kunig ader sein houptmann sullen sich och alles seines guttes vnderwinden. Item wir alle obgenanten sullen vnd globen bey gutten trauen den vorgeschr. landfrede fumff Jar nochenander folgende von datum diz brifs czuhalden vnd daz der feste gehalden werde getrulich czu helfen in allen stucken als vorgeschreben stet, vnd were daz vnser obgenant eynes vnser Ingesigel an disem brif nicht gehangen wurde mit dem selben sal der landfrede nicht vorruckt werden in eynigem Wege, sunder her sal bey ganczen crefften bleyben als vnser aller Ingesigel doran gehangen were. Ouch were yndert eyn herre des name yn disem briffe nicht geschriben were vnd der sein Ingesigel dornoch an disem briue czu dem vnsern hengen wolde daz als crefftig sein alz daz iczunt an disem briff gehangen vnd alz seyn name yn disem briff geschriben were, vnd des czu orkunde vnd ganczer bestetigunge habe wir vnser Ingesigel mit rechten wissen gehangen. Datum Brunne anno et cetera XXI° feria secunda post Martini.

Juramentum

Ich swere of gotis martir daz ich der fier artikel die ich mit andern meinen helffern iglichen gehalden habe nemlich von gotes leichnam vnd blute vnder beyden gestalten entpfounge, iglichs pristers predegunge uffen sunde straffunge, der priesterschaft gutes entnemunge, vnd kirchen brechunge, der pfaffen vnd geistlich lewte vortilgunge noch keynerley ander iresal von der heiligen cristenheit vnd der Romischen kirchen vordampmet vnd nemlich die gehalden gepredigt vnd geschreben haben Johann Wiclef Johann Hws noch ire nochfolger nymmer halden seynnen noch nochfolgen wil mit worten noch mit werken mit rate noch mit tat.

Ich were daz ich halden wil cristilichen globen in allen stucken als daz haldet vnd halden wirdet die heilige cristenheit vnd die Romische kirche vnd gehorsam sein wil dem babiste meinem bischofe vnd den pristern van in gegebin vnd gesaczt in deme daz den gelawben antrifft vnd in andrin dingen die czu iren gebieten gehoren.

Item ich swere alle ketzer vnd irresame lewte in dem cristenglouben vnd nemlich die den halden werden die obgenannten irresal, sie sein geistlich ader wertlich vff meinen guttern ader anderswoe woe ich sie ankome ader erfare mit allen iren helffern ader gunnern noch meiner macht czu tilgen vnd czu vorterbin vnd dorczu mit leibe vnd mit gutte zu helffen vnd sie czu nicht vffhalden noch schutzen noch in keinen sachen hulfflich czu sein. Als bitte ich mir got zu helffen vnd sein heilige martir vnd sein heiliges ewangelium.