Also haben der hernachgeschriben reichstette erber boten den kůrfůrsten zů Wesel geantwrt uf die noteln, der si ůberein wrden zů Nůrenberg von der Hussen wegen.

Hochwirdig fůrsten gnedig lieben herrn. 1 als ewr gnad nechste mit uns zů Nůrenberg gerett hat und laßen reden, das wir uns der verainung die ir für euch genomen hant auch mithellen wöllen: biten wir ewr fůrstenlich gnad zů versten, das sich unser frůnd daruf underrett hant. und wöllen von irer rette wegen bei iren aiden in iren steten bestellen: ob keinerlai unwillen uferstůnd als von des ungelauben wegen zů Behem, das wir das understen wollen getrewlich mit ganzem fleiz zů widersten. auch wollen wir bestellen: ob keiner in unsern steten etwas davon gewar wrd, das er das offenbar und zů wissen tůn sol; so wölten wir aber darzů tůn nach dem besten. 2 auch, gnedigen lieben herrn, heisen euch unser frůnd nemlich sagen: ob sach wrde sein das ewr fůrstenlich gnad eins zins einig wrde gen Behem gen den Hussen als von der heiligen cristenheit und des reich wegen zů ziechen, darzů wolten wir unser hilf und dienst williklich tůn. und biten ewr fůrstenlich gnad dise unser antwrt gnediklich zu versten.