Magnificis viris, palatino et iudici curie regie maiestatis ipsorumque vices in iudicatu gerentibus, cunctis eciam regni iudicibus et iusticiariis, ecclesiasticis videlicet et secularibus presentes visuris Stiborius filius condam Styborii, wayvode de Bolundoch, salutem et honoris continuum in crementum. Quia Ladislaus filius Iacobi de Barachka fidelis vir in serviciis domini nostri regis unanobiscum personaliter in partibus Morauie contra hussitas et hereticos est profecturus, obhoc ipse prosecucionem causarum suarum coram vobis habitarum commode interese non valet, igitur vestras dominaciones et fraternitates presentibus petimus diligenter, quatenus universas et quaslibet causas anotatia Ladislai tam per ipsum contra alios, quam per alios quospiam contra ipsos coram vobis motas et vertentes statu in eodem absque omni gravamine et variacione aliquali ad octavas festi Beati Mychaelis archangeli, nunc venturas, velitis differi et prorogari. Datum in Bolundoch, in festo Beati Stephani regis, anno Domini millesimo quadringentesimo vigesimo septimo.