Erbern weisen vnd lieben getrewn! Als ir vns yecz habt vreschriben, wie die keczer wider in das land ze Behem sein komen, vnd wie ew tegleich warnung kome, dieselben keczer mainen zu ew, vnd ew zu bekumern et cetera das haben wir wol vernomen, vnd lassen ew wissen, daz vns von menigern andern ennden auch des geleichen botschafft ist komen, wie dieselben veind anhaym komen sein, vnd wie si fur sich in willen haben, her in das land gen Osterreich zeziehen, vnd sich an geslossern zuuersůhen. Nu schikhen wir vns mit volk vnd andern notdurften daengegen, so wir pest mugen, auf solich maynung, wellenden sich die veind keren werdent, zu ew, her in das land, oder anderswahin, daz wir in denn desterpas widergesteen mügen. Dauon begern wir an ew, daz ir ew auch desterpas fürsehet, vnd was ir von derselben veind schikhung wegen eruaret, daz ir vns das albeg fürderleich lasset wissen, daz wir vns desterpas darnach in allen sachen mügen gerichten. Daran erczaigt ir vns ein sunderliebe geualnuss. Geben zu Wienn an suntag Inuocavit, in der vasten, anno et cetera tricesimo.