Williger dienste bereitikeidt mit ganzer beheglichkeid zu allen zietin unverdrossen, erhafften, wolwiesen lieben herren, besundern frundlichen gunner und vorderer! Als uwir vernemde wiesheid uns nů nehst von sulchs gedingis eynunge und ustragk, des herrn, manne und stete im lande zu Lusicz sich sulden voreynen zu Lubbin, das sie von den ketczern nicht obirzogen wurden, geschreben hadte, begernde uch sulchir sachen geleginheid zu vorschrieben et cetera: als begeren wir uwir ersamkeid wissen, das uns unsre lieben eydgenossen, die wir am donnerstage 16. März nehst vergangin darumb ouch gen Lubbin geschickt hattin, bericht habin, das herren, mannen und stete hir im lande sulches gedingis gemenihlich eyn wurden sint, und das dem gestrengen Hannse von Polenczke vorjahet und zugegeben haben, ussgnohmen alleyne den ernwirdigen herrn ern Peter abt zum Dobirluge, den edlen herrn ern Heinrich Schengken von Landsbergk mit sienen brudern und vettern und ouch unsre stad Lugkow mit unsern burgern, gutern, dorffete und lůten uffem lande, die eyn sulch gedinge nicht habin wollen fulborten und dem vogte vorjahen, das ir uch darnach wisset zu richten; was wir ouch uwir erhafften wirdikeid und den uwern in sulchen und andern sachen mit willigen diensten fulbrengen mogen, darzu sein wir willigk und bereith unsern ganzin fliess dobie zu thůne nach unserm besten vermogen. Ouch, liebin herrn, bittin wir mit besunderm fliesse, ye unser von sulcher warnunge und botschafft wegen der verdampten ketczer, nu bie dissem unserm botin ader uff eyn ander zyt uns zu thuene, so wir uch vormals offte und vil gebeten haben, nicht zu vorgessen und vordriessen. Das wollen wir sunderlichen umb uwir liebe mit fliesse verdienen. Geschreben under unserm stad secret am sunabende vor oculi.

Rathmannen zu Lugkow.