Heinrich von gotis gnodin herzug zu Glogow et cetera.

Unsere sunderliche gunst und allis gut edelen gestrengen woltuchtigen erbern weysin besundern guten frunde unde gonner! Also ir denne uns geschrebin habit, doruff habin wir euch wedir geschreben, wes die fursten mit landen und steten rothis worden sein, do wir unsern willen zugegeben haben. Thu wir euch wissin, das die fursten mit land und steten in das feld rucken werdin unde andirs nicht wissin denne umb Parchewicz. Wollit ir euch denne hirzu schigken unde fügen, und wollit rucken in das feld mit land und steten, wo euch deucte do euch das feld mit dem beqwemsten were, do ir mochtit zu den fursten und lande komen, zo ist unsir meynunge, das is euch nyrne also beqweme were also umb Lebenberg, do hen machten wir mit unsern landen und leute komen zu euch und furbas zu den fursten. Und wollit Hans von Polenczk schreiben, das her sich dorzuschiken und fügen welde, mit euch in das feld zu rucken, also ir uns denne geschrebin habit. Wes euch hirynne zynnenlichen wirt sein, das schrebit uns mit desim botten, das wir uns mit den unsern dornoch gerichten mogin. Geben an der metwoche eilinde zur Sprottaw vor oculi anno domini et cetera 32.