Sigismundus dei gratia Romanorum rex semper augustus, ac Hungarie, Boemie, Dalmacie, Croacie etc. rex. Notum facimus tenore presencium universis, quod licet alias quadam ardua necessitate constricti ad resistendum perversis conatibus et machinamentis hereticorum in Boemia valide consurgencium, qui eciam suae inmanitatis rabie fideles dei christicolas tam morti tradentes atrociter quam in bonis funditus spoliantes, ecclesias dei demolientes, adeo debachati sunt et adhuc in sua pertinacia perdurantes nomen Christianuz eciam hodie conantur extinguere penitus, non parcentes sexui vel etati, bona ecclesiastica tam Pragensis ecclesie quam eciam aliarum ecclesiarum, monasteriorum et parrochialium, cuiuscunque eciam condicionis existant, tunc temporis certis personis proscripserimus et dederimus possidenda, sicut eciam bona monasterii Sancte Corone ordinis Cisterciensis nobili Ulrico de Rozemberg et quibusdam aliis nos fecisse preterito tempore memoramur. Nos sentientes huiusmodi donacionem et alienacionem bonorum ecclesiasticorum in personas seculares quacunque occasione seu condicione factas tam a legibus quam a canonibus fore irritas et inanes, nec debere subsistere seu valere, non per errorem aut improvide sed animo deliberato, maturo omnium electorum sacri Romani imperii et aliorum multorum principum, comitum et comunitatum imperii sacri et regni Boemie comunicato consilio prefatam donacionem et alienationem de possessionibus monasterii Sanctae Coronae prefato Ulrico de Rozemberg seu aliis quibuscunque personis quacunque occasione, conditione seu colore factas auctoritate Romana et Boemiae regia tenore presentium revocavimus, irritavimus, anullavimus, revocamus, irritamus, anulamus et nullius dicimus, pronunctiamus, et declaramus debere fore roboris vel vigoris, decernentes et volentes quod praefatus honorabilis Rotgerus abbas Sancte Corone una cum conventu suo eciam auctoritate propria assumptis sibi ad hoc si opus fuerit fautoribus et amicis, se de eisdem bonis sui monasterii omnibus et singulis, ubicunque eciam fuerint constituta, debeat et possit intromittere, tenere, utifrui et absque impedimentis cuiuscunque etiam nostras litteras habentis seu alias cum violencia possidentis, ac etiam sibi pro recuperacione eorundem bonorum fautores, promotors et adiutores eligere et recipere pro suo comodo, quociens sibi visum fuerit expedire. Presencium sub nostrae maiestatis sigilli appensione testimonio litterarum. Datum Noremberge anno domini millesimo quadringentesimo vicesimo secundo, proximo die dominico ante festum sancti Bartholomei apostoli, regnorum nostrorum anno Hungariae etc. tricesimo sexto, Romanorum duodecimo, Boemie vero tertio.