Přepis regestovaného dokumentu

Frater Anthonius Fluviani, dei gratia sacre domus hospitalis sancti Iohannis Iherosolimitani magister humilis pauperumque Christi custos et nos conventus Rhodi domus eiusdem, religioso in Christo nobis carissimo fratri Conrado de Plumberg, dicte domus prioratus nostri Alamanie, salutem in domino sempiternam. Ad illos libenter graciosum nostrum favorem extendimus, quos benemeritos reputamus, ut refferti ex gratia et exhilarati ex honore suscepto ad promovenda religionis nostre commoda libentius invigilent et ad virtutum studia ferventius animentur. Grata igitur fidedigna relatione percepto, quod gratiarum largitor dominus vos morum compositione, vite mundicia et naturali discretiva virtute dotavit, sperantes in comisso vobis regimine favente domino vos fructus uberes allaturum, preceptoriam seu bauiliama nostram sancti Petri priotatus nostri Boemie per obitum ultimi eiusdem preceptorie veri preceptoris, cuius nomen volumus, quod hic habeatur pro expressato, seu alias quovismodo vacet, vacantem presentialiter et ad nostram collationem, donationem et dispositionem propterea rationabiliter devolutam cum omnibus et singulis suis membris, iuribus et pertinenciis universis, ad eam spectantibus et pertinentibus ac spectare et pertinere debentibus quoquomodo, et cum quibus illam habuit, tenuit et possedit quilibet ultimus eiusdem preceptorie verus preceptor habendam, tenendam, regendam, gubernandam, augumentandam et meliorandam in spiritualibus et temporalibus tam in capite quam in mebris sub annua responsione et aliis oneribus impositis et imponendis rationabiliter secundum communem cursum aliarum bauiliarum prioratus predicti in capitulo provinciali prioratus ipsius per vos annis singulis infallibiliter exsolvendis, alias secundum continencium et seriem statuti super deficientem in responsionum solutione suarum editi in generali capitulo apud Aumionem de mense marcii anno sexagesimo sexto, celebrato de premissa bauilia per religiosos in Christo nobis carissimos fratres domus eiusdem quovis titulo dicti prioratus regimini nunc vel im posterum presidentes et receptores responsionum prioratus ipsius cum consilio quaduor fratrum preceptorum suarum bauiliarum responsiones benesolventium puta fratri alicui nostre dicte domus prioratus predicti sufficienti, utili et idoneo ad regimen bauilie antedicte et qui illius responsiones et alia onera benesolvat et supportet, expresse, precipimus provideri gratia huiusmodi de dicta bauilia vobis facta in aliquo non obstante invicem deliberato consilio de nostra certa scientia et speciali gratia ad annos decem continuos et completos vobis auctoritate presentium conferimus, concedimus et donamus benefaciendo in eadem vosque preceptorem et comendatorem in dicta constituimus bauilia hac serie et etiam ordinamus, conmittentes vobis fiducialiter circa curam, regimen et administrationem ac comodam dicte bauilie ac bonorum et iurium eius defensionem et recuperationem tam in agedo quam defendendo hac serie vices nostras. Quocirca universis et singulis fratribus, sororibus et donatis sub virtute sancte obedientie ac hominibus et vassalis et quibusuis alio nobis subditis, in dicta bauilia constitutis, presentibus et futuris sub sacramento fidelitatis et homaquii, quo nobis et nostre domui sunt astricti precipimus et mandamus, ut vobis tanquam eorum superiori preceptori et maiori reverenter pareant, obediant et intendant vobisque suum prebeant auxilium, consilium et favorem in omnibus concernentibus utilitatem dicte bauilie, quotiens opus fuerit et eos duxeritis requirendos. Nec non universis et singulis fratribus domus nostre quacunque auctoritate, dignitate vel officio fungentibus, presentibus et futuris, nec contra nostram presentem donationem et gratiam aliquatenus facere vel venire presumant, quin ymo iuxta eius mentem et seriem studeant inviolabiliter observare; ac priori seu presidenti prefato, ut vos vel procuratorem vestrum in corporalem possessionem pacificam et quietam dicte bauilie inducat et inductum conservet omni contradictione remota, amoto ab inde quolibet alio illicito detentore, si quis sit, quem nos per presentes amovemus et decernimus firmiter amovendeum, inhibentes vobis districtius sub virtute sancte obedientie supradicta, ne pretextu donationis et gratie nostre huiusmodi aliqua de bonis, rebus aut iuribus dicte bauilie vendatis, detis, obligetis, impignoretis, permutetis, alienetis, distrahatis seu in emphiteosim perpetuam concedatis aut quocunque alio colore quesito extra nostrum religionem transferatis sine nostra speciali licentia et mandate. Et si, quod absit, contra inhibitionem nostram huiusmodi aliquod vel aliqua operari vel facere vos contingat, illud et illa ex nunc prout ex tunc et ex tunc prout ex nunc cassamus, anullamus ac decernimus irritum et inane nulliusque penitus existere efficacie vel valoris. In ciuius rei testimonium bulla nostra eo sub plumbea presentibus est appensa. Datum Rhodi in nostro conventu die vigesimasecunda mensis novembris anno incarnationis domini millesimo quadringentesimo trigesimosexto.