Přepis regestovaného dokumentu

In nomine domini amen. Anno natiuitatis eiusdem millesimo quadringentesimo tricesimo sexto indictione quarta decima die sabbati vicesima quinta mensis augusti hora quasi vesperorum pontificatus sanctissimi in Christo patris et domini nostri domini Eugenii diuina prouidencia pape quarti anno sexto ac serenissimo principe et domino domino Sigismundo diuina fauente clemencia Romanorum imperatore semper augusto Ungarie et Boemie rege etc. illustrissimo regnante, in stubella parua honorabilis viri domini Nicolai de Vnyczow canonici ecclesie sancti Petri Wissegradensis prope Pragam et plebani seu rectoris parochialis ecclesie in Lanczhut situata in turri supra muro seu ambitu muri platee carnificum opidi Swidnicensis Wratislauiensis diocesis, in mei notarii publici infrascripti ac testium praesencia subscriptorum constitutus personaliter praefatus dominus Nicolaus canonicus licet aliqualiter languens corpore, sanus tamen mente et corporis roboris existens asserens se fore testamentarium et executorem ultime voluntatis seu disposicionis reuerendissimi olim in Christo patris et domini domini Albici dei gracia archiepiscopi Cesariensis ac praepositi seu commendarii praepositure ecclesie sancti Petri Wissegradensis prout hoc ex instrumento publico manu Mathie Halerz de Brenny clerici Pragensis diocesis publici imperiali auctoritate notarii desuper confecto clare et lucide constabat nesciens quid sibi dies futura pariat, possitque langwor ingrauescens suam mentem seu racionem ebetare aut aliquali oblivione obnubilare mentem ut sibi commissa non valeat effectui mancipare sed affectuose desiderans ne tale testamentum seu ultima voluntas siue dispositio que pro maiori sui parte dinoscitur esse cultus diuini incrementum aliqualiter deperiret sed ad suum effectum pocius deducatur non conpulsus nec coactus aliquibus vi metu et terore conpulsus aut fraude seu dolo circumuentus et seductus sed sponte et libere sano de et deliberato animo motu proprio et ex certa sua sciencia habens potestatem et facultatem virtute dicti testamenti unum vel plures testamentarios seu executores dicte ultime voluntatis seu disposicionis loco sui substitu(e)re meliori modo via jure et forma quibus melius et efficacius fieri potest et debet honorabilem virum dominum Johannem Zul canonicum dicte ecclesie sancti Petri Wissegradensis suum confratrem absentem tamen in locum suum virtute et nomine memorati testamenti ad omnia et singula que in ipso continentur testamento nichil penitus excludendo sed sicut solus posse habuerit mandatum posuit et substituit ac omnem potestatem facultatem mandatum et preceptum que uirtute huiusmodi testamenti assecutus fuit et habet in ipsum dominum Johannem Zul suum concanonicum et confratrem de legalitate fiducia et industria ipsius plurimum persumens et confidens transtulit et transfudit, ita ut omnia et singula que ipsemet substituens posset facere et faceret iam dictus dominus Johannes Zul faciat et possit facere ac prosequi valeat et finire petens sibi per me notarium publicum infrascriptum unum vel plura publicum seu publica confici instrumenta. Acta sunt hec anno indiccione die mense hora loco pontificatu quibus supra presentibus ibidem religiosis ac circumspectis viris Nicolao Wunsch Wissegradensi priore, Johanne Coburg sacristano, dominis et fratribus predicatorum ordine monasterii sancte Crucis, famoso cliente Adam aduocato in Lanczhut, Johanne Barwald et Nicolao Nayman ciuibus Swidnicensis testibus circa premissa fide dignis.

Et ego Petrus natus quondam Wenceslai de Naczeracz clericus Pragensis diocesis publicus imperiali auctoritate notarius, quia predictis substitucioni translacioni et transfusioni aliisque omnibus et singulis suprascriptis dum sic ut praemittitur fierent et agerentur una cum praenominatis testibus praesens interfui, eaque omnia et singula sic fieri vidi et audiui manu propria scripsi publicaui et in hanc publicam formam redegi, signoque et nomine meis solitis et consuetis consignaui rogatus et requisitus in fidem et testimonium omnium et singulorum premissorum.

Signum notarii pe T r u S • Petrus • Wenceslai •