Přepis regestovaného dokumentu

Wir Sigmund von gotes gnaden romischer kunig zu allen zeyten merer des reychs und zu Ungeren, zu Behem, Dalmacien, Croatien etc. kunig, bekennen und tun kunt offembar mit disem brieve allen den die in sehen odir horen lesen: wann uns der almechtig got von seynen milden gnaden mit grossen mechtigen kunigreychen erhohet und beladen hat, nemlich mit dem heiligen romischen reyche, mit dem wirdigen kunig reyche zu Ungern und der namhaftigen cronen zu Behem, und synd wir nit nach menschlichen gebrechen nicht uberal geseyn mogen, noch unsern eygenen leib nicht uberal geteylen, als wir gern teten solichen grossen sachen nach irr gelegenheyt furzuseyn und den genug zu tun, als billich und moglich were, mussen wir redliche und ordenliche wege fur uns nemen, wie wir soliche unsere sorgen mit anderen leuten, an den wir trewe und redlickeyt legen, uns helfen zu tragen; und dovon so haben wir angesehen soliche trew und lieb, vernumft und weysheyt, die wir an dem hochgebornen Albrechten herczogen zu Osterreych etc. unserm lieben sun und fursten genczlich erkant und befunden haben, so wollen wir im mit wolbedachtem mute, gutem rate unserer fursten, edlen und getrewen und rechter wissen unser land und marggrafschaft zu Merhern mit herscheften, steten, herren, rittern, knechten, landen und leuten als eynem stathalter von unsern wegen mechticlich bevelhen und eingeben und gancze macht und gewalt geben das zu verwesen und zu befryeden an unserer stat noch seynem vermogen und das zu ordnen gleicherweyse als wir das selber teten; doch so sol er nichts verpfenden noch vergeben an unsern wissen und willen unengolten der verschreibung, so vormals zwischen unser beyder seyt beschehen sint. Ouch ist beredt worden, wenn wir demselben unserm sun herczog Albrechten unsere stete und slosse Spilberg, Brunne, Eychorn, Eywanczicz und Trebicz eingeben werden als unserm stathalter, das er dann die in pflegweyse ynnehaben, vorwesen, besiczen und beseczen solle also vernemlich, das er in denselben slossen und steten leute haben solle zu ross und zu fuss eyn notdurft zu bewaren, zu befryeden und zu behalden dieselben slosse und stete, als in des beqwemlich und notdurft dunken wirdet und als wir des mit im ubereynkomen seyn und des genczlich im glauben und getrawen und die teyle in den obgenanten sloss, wo in das nach gelegenheyt der sachen allernotdurflichst und am besten bedunken wird, dieselben slosz und ouch unser land zu verwesen und ouch zu befryeden; und zu widerstattung solicher kost, die er also tragen sol, wenn er seyn volk in dieselben sloss leget und wir des begeren werden, so sollen wir im ye auf eyn gancz jar zwelf tausent schok grosschen odir pfennyng geben nach lauffe der muncze, die dann doselbs genege und geb ist, alslang wir solicher leute und pferd in denselben steten und slossen bedurfen werden. Wer aber sache, das wir solicher leute in den selben slossen und steten nicht bedurfen wurden, was sich dann verlaufen hette in der zeyt, alslang er die leute gehalden hette, das sollen wir im pflichtig seyn, was er aber leute nich gehalden hette, des sollen wir ledig und loze seyn. So sol ouch der egenant unser sun solich gelt, doruff er so leute haben wirdet, auf den egenanten slossen und steten haben und uns des stathalderampts des land zu Merhern und derselben stete und slosse nicht abtreten, wir haben dann zuvor an im und seynen erben dieselben summen, alslang er soliche leute haben und wir der bedurfen werden, genczlich beczalet, als oben geschriben steet. Ouch so sol noch mag unser sun herczog Albrecht der stathaldung des landes zu Merhern nicht absagen, ee dann wir die egenanten geslos und stete von im geloset haben. Were ouch sache, das des vorgenanten unsers suns herczog Albrechts leute von den feynden donyder legen und redliche schaden empfengen, an solichen scheden wollen wir mit demselben unserm sun gnediclich mitleydung haben und in des fruntlich ergeczen; legen aber die feynde gen seynen leuten donider, des sol er uns ouch, was er an redlichen gefangen gewunne, mitteylen. Ouch so wollen wir tausent spyesz unsers volks in dem lande zu Merhern haben und wollen mit denselben schicken und bestellen, das sy dem egenanten unserm sun zu befryednusz unsers egenanten lands zu Merhern auf unsers selbs zerung und schaden gehorsam und gefolgig seyn sollen und nachfolgen, wo er irr bedurfen wirt und als oft des not seyn wird, on alles geverde und argelist. Ouch zu behaldung unsers sloss zu Spilberg, wenn wir das dem egenanten unserm sun herczog Albrecht eingeben werden, wollen wir im achthundert schok grosschen jerlich geben on verczyhen, domit er dasselb slosz halden sol und uns dorauff nicht mer slahen noch schaden rechen. Wer aber sache, das wir im soliche achthundert schok jerlich nicht geben als vorgeschriben steet, so sol er dise achthundert schock, wye oft im die auszsteen und nicht gereychet werden, ouch auf denselben slosse haben und uns des nicht abtreten, wir hetten im dann dieselben achthundert schok, wie oft im die auszsteen, zu voran beczalet. Ouch wenn ab got wil das land zu Merhern in fryed qweme und derselb unser sun herczog Albrecht in den egenanten slossen zu befrieden und zu behalten nicht leute haben wirdet und wir der nicht bedurfen werden, so wollen wir im alle jar vyerhundert schock grosschen geben zu behalden die festen den Eychorn und er sol ouch dorauf nicht mer slahen und keyne scheden rechen. Wer aber sache, das wir im soliche vyerhunder schok ierlich nicht geben, als vor geschriben steet, so sol er dieselben vyerhundert schok, wie oft im die auszsteen und nicht gereychet werden, auch uff demselben sloss haben und uns des nicht abtreten, wir hetten im dann dieselben vyerhunder schok, wie oft im die auszsteen, zu voran beczalet. Ouch wurde dem egenante unserm sun herczog Albrechten odir seynen amptleuten der egenanten sloss eyns odir mer von den feynden ungeverlich angewunnen odir abgenott, des sol er und seyne erben gen uns und unsern erben und nachkomen, kunigen zu Behem und marggraven zu merhern, unengolten bleiben. Ouch wer es, das die feynde das land zu Merhern uberzugen odir eynen furslag dorynn tun wurden, so wollen wir demselben unserm sun herczog Albrechten helfen nach allem unserm vermogen und ouch allen den unsern empfelhen, ab wir nicht zu land weren, das sy demselben unserm sun und seynen hauptleuten helfen und beystendig seyn, domit das land gerett werde. Wer ouch sache, das der egenante unser sun herczog Albrecht dheyne sloss, stete, merkte und gutere, die unsere vorfaren, kunige zu Behem und Marggraven zu Merhern, oder wir versaczt hetten, in dem lande zu Merhern lozen wurde, des wir im sollen gewalt geben in disem brieve zu tun, dieselben sloss, stete und gutere sol er uns und unsern erben, wenn wir des begeren werden, wider zu lozen geben, doch nicht hoher, wann sye vorhyn verschriben weren; losete er sye aber neher, wenn sye verschriben weren, so sol er sye uns ouch neher zu losen geben, als er sy gelozet hette on alles geverde. Ouch so mag derselb unser sun herczog Albrecht alle amptleute und burggraven zu Merhern entseczen und seczen, als oft in des notdurftig und gut dunken wirdet, auszgenomen an den slossen und steten, die wir unsern Ungeren eyngegeben und bevolhen haben, der sol er nicht verendern an unsern wissen und willen. Mit urkund disz brieves versigelt mit unserer kuniglichen maiestat insigel. Geben zu Niclaspurg nach Crists geburt vyerzehenhundert jar und dornach in dem zwey und zwenzigisten jare, am nechsten montag vor unserer lieben frawentag annunctiacionis, unserer reyche des ungrischen etc. in dem fumf und dreissigisten, des romischen in dem zwelften und des behemischen in dem anderen jaren.