Přepis regestovaného dokumentu

Sacrosancte et vniuersali synodo Basiliensi in spiritu sancto legittime congregate, vniuersalem ecclesiam representanti, Sigismundus Dei gracia Romanorum imperator, semper Augustus, ac Vngarie, Bohemie, Dalmacie Croacieque rex, salutem et reuerenciam ac omnis prosperitatis incrementum. Quia secundum formam pactatorum dudum in ciuitate Pragensi et Iglauie inter legatos sacri Basiliensis concilii ac nuncios regni Bohemie et marchionatus Morauie, supradictos nuncios et oratores suos ad prefatum sacrum concilium ex omni statu regni et marchionatus, videlicet ecclesiasticorum, nobilium, ciuitatum et plebeiorum seu popularium personarum transmittere debent, et expedire pro consummacione et implemento condictorum prefatorum, prout in ipsis condictis et compactatis plenius continetur, verum prelati et sacerdotes ceterique ecclesiastici viri ac barones, milites et nobiles, necnon ciues Pragenses, ac nuncii ciuitatum, oppidorum, terrarum, communitatum et vniuersitatum, et marchionatus predictorum nuper in ciuitate Pragensi ad euocacionem nostram, ac coram nostra maiestate in generali congregacione tocius regni, prout moris et hactenus obseruatum, constituti solemniter elegerunt, deputarunt, constituerunt, crearunt et ordinarunt suos ac regni et marchionatus prefatorum mandatarios, ambasiatores, oratores ac nuncios, videlicet nobiles et generosos Petrum de Zwirgiz et Pzibicomen de Klenow, prudentesque ac prouidos Wenczeslaum scabinum Pragensem, et Mathiam de Chlumpezin, ac honorabiles magistros Procopium de Pilzna et Johannem Pzibran ad prosequendum, proponendum, allegandum, disputandum, pertractandum, concludendum et consummandum omnia et singula, que iuxta formam compactatorum predictorum agenda et facienda sunt communiter et diuisim, cuiuscumque condicionis et qualitatis existant, dantes et concedentes ipsis suis nunciis et ambasiatoribus, mandatariis et oratoribus in omnibus et singulis premissis et quolibet premissorum, prosecucionem ipsorum compactatorum ac alias quascumque res eis et regno et marchionatui vtiles concernentibus, que quoquo modo emergere, condependere et connecti poterant, plenariam et omnimodam potestatem, ideoque nos de premissis verum testimonium perhibentes, vestris paternitatibus nuncios, mandatarios, oratores et ambasiatores ipsos conmendamus, rogantes quatenus eedem vestre paternitates eos benigne suscipiant et pertractent, eisque in agendis predictis omnem humanitatem et omne officium benignitatis impendant, que mittentibus exhiberent; quicquid enim ipsi egerint et concluserint ratum erit, ac si ab omnibus de predicto regno et marchionatu conclusa fuissent. In cuius rei testimonium sigillum nostre maiestatis presentibus est appensum. Datum Egre, Ratisponensis diocesis, anno domini MCCCCXXXVII°. die XXI^a. mensis Julii, regnorum nostrorum anno Vngarie quinquagesimo primo, Romanorum XXVII°., Bohemie XXII°., imperii vero quinto.