Přepis regestovaného dokumentu

In nomine domini amen. Wernherus dei gratia abbas, Deborius prior, Paulus supprior, Joannes cantor, Joannes refectionarius, Martinus pictentiarius, totusque conuentus monasterii Cladrubiensis ordinis sancti Benedicti Pragensis dioecesis. De nostro scitu et bona voluntate tam praesentibus quam futuris tenore praesentium facimus notum, quod famosus Bussko dictus Klenowecz de Czemin armiger dicte dioecesis curiam cum area et duabus metis seu laneis agrorum, quas et quos discretus vir Marquardus dictus Vouss de Modrzeiowicz similiter armiger suique praecessores et praedecessores iure feudali, quod naprawa vulgariter nuncupatur in villa nostra Honozowicz tenuit et possedit, seu tenuerunt et possederunt, huiusmodi curiam cum agris, pratis, pascuis, rubetis, silvis, rivulo ac libertatem antea et ab antiquo in ipsorum metis, gradibus et limitibus expositis et locatis et cum omnibus iuribus, libertatibus et pertinentiis ad huiusmodi agros, seu naprawam spectantibus et pertinentibus uniuersis, et ab antiquo obseruatis a praefato Marquardo pro certa pecuniae summa sibi plenarie persoluta pro se et suis haeredibus ac successoribus emit et comparavit in suprascriptum ius, quod naprawa dicitur, per ipsum dicto iure feudali, ac suos haeredes et successores tenendum, regendum, possidendum et gubernandum, atque utifruendum. Quare nos abbas et conuentus praedictis praefatis Busskoni et suis heredibus ac successoribus plenam liberam ac omnimodam potestatem praesentibus damus et concedimus, quatenus huiusmodi curiam, agros, silvas, rivulum cum omnibus juribus, libertatibus et usibus universis, sicut praemissum est, emptam, emptos et emptis, omni repugnantia procul mota libere teneat, possideat atque regat, teneant, possideant atque regant, omnesque obuentiones et emolumenta provenientes et provenientia in proprios convertant usus. De quibus quidem curia, agris seu naprawa, prefatus Bussko, haeredes et successores sui, nobis et monasterio nostro duntaxat, quando necessitas ingruerit, fueritque requisitus, seu fuerint requisitus, seu fuerint requisiti, super nostris damnis et expensis, prout ceteri feudales, seu naprawnikones, in uno equo numero tres sexagenarum grossorum valentem cum balista in lorica, sub pilleo ferreo, tenebitur, et tenebuntur deseruire. Si vero ipse Bussko, haeredes et successores sui, de praedictis curia, agris seu naprawa nollet seu non valeret, seu nollent aut non valerent nobis et monasterio nostro servire, alias ut praemissum est deservire, quod extunc ipsam curiam, cum agris seu naprawa, cum iuribus et libertatibus praedictis universis in praedictum feudale ius, prout melius poterit, seu poterint equali armigero, aut alteri cuicunque probo homini, seu censuali vendere poterit, de scitu tamen domini abbatis existentis et voluntate, omni contradictione procul mota. In eventum vero, in quem si ipse Bussko (quod absit) ab hac luce migrauerit, priusquam Anna conthoralis ipsius, at ex tunc heredes et succesores ipsius Busskonis, praefatae Annae conthorali suae nomine dotis et pro dotalitio decem sexagenas grossorum bonorum de praedictis bonis universis, tam mobilibus quam immobilibus cum vestibus suis et lectisterniis debent dare et assignare. Nihilominus tamen huiusmodi curiam cum agris iure praedicto eadem Anna tam diu cum usufructu et aliis pertinentiis ad ipsam curiam et agros spectantibus, tenebit et possidebit, donec eidem decem sexagenas grossorum praedictorum nomine dotis, cum vestibus et lectisterniis, ut praemissum est non persoluerent cum effectu. Postquam autem huiusmodi decem sexagenas grossorum cum dictis vestibus et lectisterniis dicta Anna receperit per amplius in praefata naprawa nihil minus obtinebit. Ab omnibus autem datiis, tagliis, seu quibuscunque bonis, contributionibus, solutionibus et exactionibus praefatum Busskonem, haeredes ac successores suos quittamus, libertamus, atque quittatos, liberos dimittimus et solutos. In quorum omnium testimonium et robur firmitatis sigilla nostra videlicet abbatis et conuentus praesentibus sunt appensa. Datum in nostro monasterio Cladrubiensi anno domini millesimo quadringentesimo undecimo, feria tertia ante festum Cathedrae s. Petri apostoli.

Insuper nos Martinus, eadem gratia abbas dicti monasterii Cladrubensis modernus, Avion (?), Petrus prior, Paulus supprior, Ioannes cantor, Harandus refectoriarius, Petrus pictentiarius, totusque conventus dicti monasterii Cladrubensis ordinis sancti Benedicti volentes ut nostrorum praedecessorum atque praecessorum in nullo vitientur, sed per amplius roborentur, per scripturam et confirmentur, ideo omnia et singula superius in hac littera expressa et conscripta, scripto et littera praesenti ratificando, in omnibus et singulis clausulis et punctis superius contentis, approbamus et confirmamus, quatenus robur in perpetuum obtineant firmitatis, harum quibus nostra sigilla videlicet abbatis et conventus appensa sunt testimonio literarum. Datum anno domini millesimo quadringentesimo vicesimo, feria 4 in Epiphania domini, in monasterio nostro Cladrubiensi.