Přepis regestovaného dokumentu

D. f. Stephano de Stankow, canonico Pragensi, apostolice sedis nuncio necnon iurium, fructuum, reddituum et proventuum in regno Bohemie camere apostolice debitorum collectori, salutem etc. Ex fideli solicita ac diligenti providencia … Hinc est, quod nos te, de cuius circumspeccione plurimum confidimus, nuncium apostolicum et generalem collectorem et receptorem fructuum, proventuum aliorumque iurium et censuum dicte camere in regno Bohemie debitorum et debendorum usque ad nostrum et eiusdem sedis beneplacitum tenore presencium facimus, constituimus et eciam deputamus, omnes alios et singulos huiusmodi collectores et succollectores ac pecuniarum ad dictam cameram spectancium receptores, quovis fungantur officio vel nomine nuncupentur, in eodem regno quacunque hactenus auctoritate deputatos et commissiones omnes, super huiusmodi collectorie, succollectorie et receptorie officiis aliis quam tibi sub quavis verborum forma per quoscunque et quavis auctoritate factas, penitus revocando, ac tibi per te vel alium seu alios clericos dumtaxat fide et facultatibus ydoneos nostro et dicte camere nomine petendi, exigendi et recuperandi a quibuscumque prelatis, capitulis, collegiis et convetibus ecclesiarum et monasteriorum quorumlibet aliisque personis ecclesiasticis, secularibus et regularibus, exemptis et non exemptis ordinum quorumlibet, ac eciam laycalibus personis omnes et singulas pecuniarum summas nobis et camere predicte debitas et debendas, eciam si bona huiusmodi fuerint confiscata, necnon res et census annuos ac bona ecclesie ac camere predictis aliaque iura in prefato regno quacunque racione vel causa ad nos vel ad eam nunc et ad imposterum pertinencia, quecunque, quotcunque et qualiacunque fuerint, que in regno huiusmodi peti et exigi consueverunt, communibus et minutis serviciis, racione provisionum prelatorum quacunque auctoritate ibidem ad quarumcunque ecclesiarum et monasteriorum regimina promotorum eidem camere debitis, dumtaxat exceptis, petendi, exigendi, et recipiendi ac solventes de receptis dumtaxat quittandi, liberandi et absolvendi racionesque et computa a quibuscunque collectoribus, succollectoribus et receptoribus ac aliis officialibus pro dicta camera in prefato regno hactenus deputatis et deputandis seu personis aliis, in quantum utilitatem et negocia dicte camere concernunt, audiendi et examinandi ipsosque ad id, si necesse fuerit, ac contradictores quoslibet et rebelles, cuiuscunque status, gradus, ordinis, condicionis vel preeminencie fuerint, eciam si pontificali vel alia quavis prefulgeant dignitate, auctoritate nostra per censuram ecclesiasticam ac bonorum ipsorum sequestracionem et arrestacionem personarum et alia iuris remedia appellacione postposita compescendi ac eciam excommunicacionis et alias censuras et sentencias in non solventes tibi vel a te deputandis iura et debita ipsius ecclesie et camere, ut prefertur, per te vel alium seu alios tuo et dicte camere nomine inflictas et promulgatas, si eorum contumacia exegerit, quociens opus fuerit, agravandi et alias contra eos sentencias promulgandi et contra quoscunque tibi et tuis officialibus iniuriantes seu te vel dictos tuos officiales impedientes et negocia dicte camere directe vel indirecte, publice vel occulte, perturbantes auctoritate prefata procedendi, prout ordo exegerit racionis, et, si necesse fuerit, ad comparendum coram nobis vel camerario nostro infra certum terminum competentem per te eis assignandum citandi et eciam, si opus fuerit, auxilium brachii secularis, eciam ordinum religiosorum quorumcunque et personarum ecclesiasticarum exemptarum et non exemptarum, invocandi sentenciasque excommunicacionis, suspensionis et interdicti in inobedientes, contumaces et rebelles tam per dictos predecessores seu precessores tuos collectores et eorum succollectores quam per te et a te deputandos latas et ferendas, cum ad obedienciam debitam pervenerint, tollendi et suspendendi ipsosque ab ipsis, iniuncta eis pro modo culpe penitencia salutari et aliis, que de iure fuerint iniungenda, auctoritate nostra in forma ecclesie consueta absolvendi et cum ipsis super irregularitate, si quam sic ligati, non tamen in contemptum clavium, celebrando divina vel immiscendo se illis contraxerint, auctoritate nostra dispensandi, non obstantibus … , auctoritate nostra predicta facultatem et potestatem plenariam concedentes, ita tamen, quod in fructibus, redditibus et proventibus ac aliis bonisquibuscunque ad dictam cameram spectantibus ipsi camere persolvendis ultra unius anni dilacionem dare nequeas quodque in singulis civitatibus et diocesibus infra tuam collectoriam consistentibus, si sint ample et diffuse, ultra unum, et si parve fuerint, in duabus eciam ultra unum dumtaxat succollectorem non deputes et omnium et singulorum succolectorum, quos te deputare contigerit, nomina et cognomina statim, cum illos deputaveris, nobis et camerario predicto aut gentibus dicte camere clare et distincte transmittere quodque singulis biennis de receptis et gestis per te in huiusmodi collectorie officio racionem et computum reddere necnon, quicquid per te in premissis recipi contigerit, per literas cambii vel alium tutum modum nobis aut camerario seu locumtenenti eius seu gentibus camere prelibate, quantocius commode poteris, mittere non postponas. Volumus tamen, quod, antequam huiusmodi officium incipias exercere, in manibus dicti camerarii nostri seu eius locumtenentis seu alterius per alterum eorum deputandi de officio ipso fideliter exercendo ac alias fidelitatis debite in forma camere prelibate consueta prestare tenearis iuramentum ipsique succollectores per te deputandi id idem manibus tuis, antequam illud exerceatur, similiter prestare teneantur. Tu igitur predictum officium iuxta datam tibi a deo prudenciam sic studeas bene, fideliter et laudabiliter exercere, quod sperati exinde fructus subsequantur tuque exinde apud nos et sedem predictam possis merito commendari. Datum Florencie id. Maii pontificatus nostri a. tercio.

Supra: (sin.) Cincius; (dext.) De curia — In fine: (sin.) Coll. per me I. Comitis; (dext.) Jo. Ilsung.