Přepis regestovaného dokumentu

Allerdurchlewtigister kunig vnd genedigister liber herre, vnsern getrewn dinste zuuor. Hewt ist vns zukomen erst Ew. Gn. brief, dorynnen Ew. kunigl. Genad vns vnd vnsere macht vordert zu sulicher hilff, domit Ewere Hochmechtikeit den Erwirdigen in got vater vnsern Bischof vnd sein geslos Chremsir vermeinet zuretten vnd von veinden zuderledigen, do durch das lant befridet mocht werden. Des sein wir vnd andre E. G. getrewe arme lewte gar gros derfreiet, Bittunde getrewlich got den almechtigen vor E. G. lanckleben. Vnd Ewer Durchlewchtikeit thun wir zuwissen, das wir vor dem als vns diser E. G. brieff zukwam, mit herrn Janken von Knyewicz hawptman zu Luthaw vnd auch mit der frawn von Sternbergk voreinet vnd beredt haben gern dorczu zuhelffen, domit wir dem egenanten herrn vnserm Bischoff ein Stewer gethun mochten, vnd E. G. volk das zu Chremsir ist, vnd haben auch besucht vnd vmb hulff angeruft den hochgepornen fursten herczog Premken vnd herrn Janken von Tyczein. Vnd herczog Przemko hat vns geantwort, das er mit herren Gurziken von der Luckaw der auch gern dorczu helfen wil sich Ew. kunigl. G. zu eren vnd dem kristen glawben zu hulphe willig mit seiner macht erczeigen wil, vnd wir vernemen nicht anders denn das er an vorcziehen nu gen Preraw komen wirt. Vnd wie wol vnsere Soldner die wir got weis gar swerlich bies hieher als mit CXXX pherden vf sold awsgehalden haben, an scheden, do fur In dennach vnser vorgenant Geistlicher vater der Bischof sten wold vnd das zugeschriben hat, nyrent aws der Stat reiten wollen Jedoch wellen wir vns selbs derheben vnd neben E. G. gebot mit herczog Przemken herren Janken vnd der frawn von Sternbergk volk dorczu gerne neben vnserm vormugen beholfen sein, als E. G. willige vndertanen vnd getrewe kristen, Vnd bitten mit diemutigen gebete, Ew. kunigl. Maiestat geruhe dorczu zuthun domit diese ketczer Gotes der heiligen kristenheit des Romischen Reichs vnd E. G. hawptveind genidert wurden, dorumb E. G. von got reichen lan an czweifel emphahen wird. Datum Dominica ante Circumcisionem domini.