Přepis regestovaného dokumentu

Hochwirdigister vnd Erwirdigen in got vätter, prelaten vnd Herren. Vnser vntertenig willig dienste seyn ewer vätterlikeit mit ganczem fleisz bereit. Gnedig vnd Lieb Herren! Ewer Hoch. briefe vns gesandt, der datum heltet XVIII. Octobris nehstuergangen haben wir ersamclich empfangen vnd die andern ewer erwirdikeit briefe, die vns damit geantwurtt wurden, nach ewer begerung als gehorsam süne den von Eger vnuerczogenlich geschickt, daz die fürbas in das Lande gen Beheim komen möchten. Vnd bitten darauf ewer vätterlikeit gütlich zuuernemen, daz wir als die, die der Cristenheit notdurft vnd geprechen gern gut sehen, den vorgenannten von Eger seid verschriben vnd gebetten haben vns in gut zu verschreiben, alsuil In wissend were, ob sölliche ewer Hoch. briefe in das Lande gen Beheim geantwurtt vnd wie die von In empfangen vnd aufgenomen weren, oder was Irs fürnemens darumb wölt seyn. Also haben vns dieselben von Eger widerumb verschriben vnd geantwurtt, wie sie dieselben ewer erwirdikeit briefe bey Ir selbs botschaft den einen gen Pillsen vnd den andern der alten stat zu Prag auch vnuercziehen gesandt vnd In dieselben von der alten stat zu Prag in eynem behemischen brief, den sie zu dewtsch gemacht vnd vns des ein abschrift in irem brief verslossen haben geschikt, ein antwurt darauf getan haben, als denn ewr vätterlikeit in den abschriften derselben brief hierynnen verslossen eygentlicher vernemen wirdt. Söllich sache haben wir ewer Hoch. niht wellen verhalten, sunder in gut vnuerczogenlich verkünden, getrawend, daz ewr erwirdikeit aber wol fürnemen werde, was nu darczu gebüre. Vnd bitten ewr vätterlikeit dienstlich das also in gut von vns aufczunemen Denn wo wir ewer Hoch. Dienst vnd wolgefallen etc. Scriptum ut supra Sabato post Andree apostoli.