Přepis regestovaného dokumentu

Wir hernach geschribene nasse obirstermeister der iuden alt nasse mit eym haws Smohel von Regenspurg, Smohel der Rehel bruder, vnd Dauid auch mit eym haws die vier gesworen meister der iuden vnd ich nasse alt Iosep, Clara, iudelmeister des Iekel meisters, eidem von Suczine vnd Gutel, der Liblangin tochter, wir alle itzud genante iuden mit hewsern vnd wir die andern iuden genemtlich, hie zu Eger an der czeit. Wir bekennen vnd tun kunt vor allermenicklich die disen brief sehen aber horen lesen, also als dum unsers allergnedigsten hern des Romischen vnd von Ungarischen et cetera konigs gnaden wille vnd meynung ist gewesen vns von Eger zu czihen vnd do nicht zu siczen es sey denn mit der von Eger guten willen vnd alz vns denn sein gnad geschreben, daz geboten vnd geheyszen hat vnd auch vns all vnser iuden hewser, schul vnd freithofs, so wir vnd ander zu Eger haben gehabt czum czeyhen vnd die der stat vnd gemein zu Eger zu nucz inne czu lassen vnd wir nu vnser wonung vnd wesen yderman, wo er beste mag besuchen musz, darkegin vnd die obgenan vnser hien von Eger die besunder gnad getan haben vnd vnser idem einen halffental an seinen haws als daz verkauft ist, des geldes gegeben, vnd vns dorumb vnd auch vmb das gelhaws gancz benůgt haben, daz wir in gutlichen dancken vnd daz ander halpteyl des geldes schol die stat vnd gemein czu irer notturft aufheben. So haben sy vns auch die gunst getan vmb vnser schule vnd freythof, daz die vns von wahourgis vber czwey iar sůllen steen vnczubrochen in aller masz als iczund doraws nichcz anders in der czeit czu machen, denn ab sie den freithof beschen aber in die schule ichts legen wolden czu irer notturft daz sullen vnd můgen sy wol tun. Ouch so haben wir vnsern hern von Eger all vnser begnadunge vnd freyheit vnd ander brief geantwurtt die wir von keysern konigen vnd in haben hehabt in welchermasz die gewesen sind vns der auch ettliche vber vnser hewser lawtten vnd ab keinerley brief vorhalden vnd hinfůr in kurczen aber langen czeiten gefunden furbracht vnd geweist wurden von begnadunge wegen die wider die benanten von Eger weren in welchem forme vnd lawtte die weren begriffen dieselben vnd dy obgenanten sullen furbafurer ab vnd tod sein vnd vns vnsern erben, erbnemen vnd nachkomen nymermer zu nucz noch in zu schaden komen nach kein craft noch macht ... haben in kemerweis als dann das alles vnsers gnedigsten hern konigs maiestat vnse vnsern hern von Eger doruber geben clerlich inneheldet vnd haben vns also gutlich mit vnsern hern von Eger geschiden also day wir in demuticlich dancken vnd gereden vnd geloben, auch daz wir alle vnser eynteil noch keiner besunder noch nyemants von vnser aller vnser eins aber mer von sulchs wegk zihens vnser hewser, schule vnd freithofs noch von bete wegen als vns vnser hern von des von Blawen vnd ander wegen … vnd vil mit vnser schuld alz sy vns sind schuldig gewesen ausczuhalten vnd vmb friste gebeten haben vnd sunderlich vmb sulchen gesuch der vns gein dem von Blawen abgeteydigt warde nemlich das gewesen ist als man czalt im sybensundczweniczigisten iare am freitag nach sand Erharts tage bis in das newnvndczweniczigste iare auf sand Laurenczen tag nach lawtte vnsers gnedigen hern marggrauen von Brandeburg brife den vnser hern von Eger haben noch von vnser begnadung vnd freyheitbrife noch von keiner andern sach wegen, wy die noch mochten erdacht werden, gein in noch all den iren ewiclich nymermer keine foderung, zuspruch noch ansprach haben sullen, können noch můgen mit keinem geischtlichen, wertlichen noch andern rechten noch in keiner andern weise sy zu besweren noch fur zubrengen on argk vnd on allez geuerde. Vnd des alles zu vrkund vnd das daz von vns gehalten werde, alz oben begriffen ist, haben wir abgenanten iuden yder besunder gebeten den namhaften hern Heinrich Sligk die czeit vorweser der pflege zu Eger, vnd die vesten Vlrichen Sak die zeit houptman czu Eger vnd Erharden Gefeller, daz sy alle drey ire insigel durch vnsern fleissigen bete willen czugeczewkunnsz in vnd iren erben on schaden an disen brief haben gehangen, dorbuter wir vns vberinden bey vnsern guten waren iudischen trewen, eren vnd eiden fur vns vnser erben eibnemen vnd nachkomen alles das zuhalten, daz an desen brife beschriben stet, der brif ist geben am dinstag nach dem suntag alz man singet invocauit in der vasten nach Cristi geburte virczenhundert vnd im eynvnddreissigisten iaren.