Přepis regestovaného dokumentu

Wir Sigmund von gotes gnaden Romischer Kunig zu allentzeiten Merer des Reichs und zu Hungern zu Behem Dalmatien Crvatien etc. Kunig. Bekennen vnd tun kund offenbar mit diesem Briefe allen den, die In sehen oder horen lesen. Als ytzund vnsere liebe getreuen die Burgern vnd Inwoner, der Rat zu Eger, Reich vnd Arm, in diesen sweren vnd wilden leuffen sich selbst vnd Ir leib vnd gut grosslich angreiffen vnd darlegen der heyligen Krystenheit vnd vns zu dienst vnd lieb, alsdann offenbar vnd landkundig ist vnd doran nyemand schonen in der Stat, wer der sey, er musse darynne mitleydung haben, als billich ist. Also haben Sy itzund zu vns gesandt in erbere botschaft vnd vns zu erkennen geben, wie die Judischeit bey in, der ettwe viel ist, in solichen Freyheiten sitzen ynd also begnadet seyn, daz Sy mit der egenannten unser Stat nit leyden weder an wachen, graben oder andern arbeyt vnd darlegung dorumb gros vnwill vnd widerwertickeit von den gemeinen leutten erstanden ist, also daz In nit zuleyden meynen, dieweil Sy selbs also swerlich daz ir darlegen daz dann die Juden dorynne also sollen ledig geen, vnd besorgen die Edelsten vnd der Rat, dieweil Sy die Judischeit biszher also bey Irem alten herkomen gern behalden vnd beschutzet haben, daz dann die gemein in solichem vnwillen Sy verdenken vnd vberfallen mochte, als zu besorgen ist, dorusz der egenanten vnser Stat grosser vnrat, verderben vnd vnuerwintlicher schaden entsteen mochte, vnd haben vns demuticlich angeruffet, Sy in solichen Sachen zuuersorgen vnd solichen vnrat gnediclich zuunderstehen. Daz wir, also zu hertzen genomen vnd mit gutem Rate vnser getreuen betracht haben, das vns das billich zu vnderkomen ist, vnd haben mit dem Judenmeister vnd andern Juden von Eger, die ouch alhie bey vns sind, reden vnd In durch des besten willen, vnd solich unfur zuvndersteen anderswo In wonung vnd enthaldung bestellen lassen. Vnd setzen doruf, ordnen vnd wollen mit diesem briefe vnd von kuniglicher macht, daz dieselben Juden alle vnd ygliche, was der sein, hinfur in der Stat zu Eger nit beleiben noch wonen sollen, vnd wir geben auch dem egenanten Burgermeister, Rat vnd Burgern gemeinlich zu Eger gewalt vnd vrlaub mit diesem briefe, daz Sy dieselben Judischeit von In weisen sollen, vnd mogen, doch daz In alle Ir hab, pfand vnd schuld, wo wir Sy die haben, mitvolgen sol, dorynne vnser getreue, die von Eger, furderlich vnd hilflich sein sollen, vszgenomen Ire heüser, hofe die Synagoge vnd den Judenfreythof, die sollen unsern getreuen den von Eger beleiben, also daz sie der Stat nütz vnd besserung damit suchen, vnd solich gelt dortzu wenden, vnd usz der Synagoge eyn Capellen got, vnd vnszer lieben frawen zu lob stifften sollen. Und wiewol uns die egenannten Juden allhie durch unsere Rete zu gesagt haben, daz Sy vnsern getruen den von Eger alle brief, die Sy uber solich Ire Freyheit haben, es sey von keysern kunigen, vns oder den von Eger vbergeben und Sy und die Iren dorumb zu ewigen czüten unbekummert beleiben lassen sollen und wollen; yedoch wer Sache, daz Sy des nit teten vnd solich brief verfurten oder unterdruckten, So vernichten vnd toten wir Sy alle in craft disz briefs vnd kuniglicher macht, also daz Sy hinfur kein craft nocht macht haben sollen in gericht oder vszerhalb gerichts vnd sollen auch den egenanten von Eger vnd den Iren an allen enden vnschädlich sein. Es sollen auch die egenannten Juden den von Eger ein vrfehde tun, daz Sy solich sache, die von vnser erlaubung geschehen ist, nymmermer ehren aber zu arg wenden sollen, durch sich selbs oder durch ander leutte, sunder in guten beleiben lassen, nach vnser ordnung, vnd irer sache, daz die Juden in gemein oder sunderheit, oder yemand von Iren wegen, wer der were, sich wieder die egenanten von Eger ichts annemen oder Sy dorumb beteidigen wolt, der sol im vnser vnd vnsrer nachkomen swere vngnad verfallen seyn. Mit vrkund ditz briefs. versigelt mit unser kuniglichen Maiestat Insygel. Geben zu Nuremberg nach Christs geburt virtzehnhundrt Jar vnd dornach in dem dreissigistem Jare am nechsten Donnerstag nach sant Franziscitage, vnser Riche des hungrischen etc. in dem vyrunduirtzigisten des Romischen in dem eynundtzwenzigisten und des Behemischen in dem Elfften Jaren. Ad mandatum domini regis Caspar Sligk.