Přepis regestovaného dokumentu

Wir Sigmund, von gotes gnaden Romischer kayser, zu allen zeiten merer des richs und zu Hungern, zu Beheim, Dalmacien, Croacien etc. kunig, enbieten unsern lieben getreuen den mannen und steten unser land Budischin, Gorlicz, Sittaw, Lubann, Lubaw und Camencz unser gnad und alles gut. Lieben getreuen! Uns ist warhaffticlich furkomen, wie ettlich schedlich leut sich umb unser stat zur Sittaw enthalden, die danne derselben stat, landen und leuten teglich sulche scheden zuziehen, wo das in kurcz underkomen wurde, das dann dieselb stat und lant zu unverwintlichen verderben komen mochten. Und wiewol wir, ob got wil, nach uszrichtunge ettlicher sach in disem unserm kungrich, ob got wil, kurtzlich in dieselben unsere land zu komen hoffen, fried und gemach zu schaffen, ydoch das dieselb stat, land und leut sich die zeit desterbas enthalden und geweren mogen, so haben wir gedacht, das von euch allen gemeinlich 60 pherd gereysige und guter gesellen gen der Syttaw gelegt wurden. Und dorumb ist unsere ernste meynunge, begeren und gebieten euch ouch ernstlich und vestiglich mit disem briff, das ir zu stunde nach angesicht diszes briffs under euch usz allen landen und steten ein anslag macht und sulch 60 pherd den von der Sittaw zu hilff und rettung sendet und bey sy leget, als lang bysz uns got in dieselben land gehilffet, als wir kurczlich hoffen. Doran tut ir uns solich dinst, die wir gen euch gnediglich erkennen wollen. Geben zu Prag an sand Linharts abend unser rich des Hungerischen etc. im 50, des Romischen im 27., des Behemischen im 17. und des kaysertums im virden jaren.