Přepis regestovaného dokumentu

Wir Sigmund et cetera bekennen et cetera. Als wir vor ettlichen jaren dem edeln Puoten von Czastolowicz seligen unser land zu Munsterberg verschriben hatten umb ain genante sum gelcs, nemlich vi^m schock behemisch groschen nach laut unsere maiestatbriff dorüber gegeben, und wie nu mit der hochgeboren furstynne des egenanten Puothen mutter und seinen kinden umb das egenante land einig worden sind, das vor in dreytausent schock geben und auszrichten sollen, und damit sol uns das egenante land gancz wider ledig sein zu demselben gelt wir dan tege haben zu beczalen, alsdan zwischen uns beteidingt ist, also hat die hochgeborn Eufemia geborn von Munsterberg grefin zu Ottingen unser liebe andechtige uns zu wolgevallen und liebe der egenanten herczogin und des egen Puothen kinden viertausent reinisch guldin und hundert schock behemischer groschen an denselben dreytausent schocken beczalt und auszgericht hat, und darumb die egenante Eufemia solicher sum gelcz, sicher zu machen, ǁ fol. 717v so haben wir ir daselb unser land Munsterberg mit allen und jeglichen iren stetten, slossen, merckten, dorffern, wassern, teichen, vischereyen, wiltpennen, hofen, gerichten, mulen, eckern, wisen, vogelweiden, czinsen, renten, nuczen und allen rechten, freiheiten und zugehorungen, wie man die benennen mag, fur die egenante sum viertausent reinisch guldin und hundert schock groschen verseczt, verpfendt und verschriben, verseczen, verpfenden und verschreiben ir die von kuniglicher macht in crafft dicz brieffs, also das die egenante Eufemia und ir erben des egenanten lands mit allen seinen zugehorungen, als vergeschriben stett, gebrauchen und niessen sollen, also lang bisz wir oder unser nachkomen, kunige zu Behem, in solich obegenante sum gelcz redlich auszrichten oder in darumb ain genugd tun, alsdann so sollen sy uns des egenanten landes mit allen zugehorunge zu stunden abtretten. Und wann aber die stat und schlosz daselbs zu Munsterberg auszgebrand und vast verwüstet ist, dorumb so gunnen wir der egenanten Eufemia, das sie dasselb schlosz pessern und mit baw wider anrichten sol; und was sy also daruff legt bescheidenlich und mit guter kuntschafft erber besessner leutt, das sol sie und ir erben zu der egenanten sum auff dem land haben. Was sie auch verseczter guter, die von dem land verseczt weren, rente oder nucz mit irem gelt an sich lozte, das sie dan mit den pfandbrieffen und ǁ fol. 718r kunstchafft erber leutt beweisen mocht, dy selben sum sollen wir oder unser nachkomen ir auch bezalen mitsampt der haupt sum die obgemelt ist. Doch nemen wir uns und unsern nachkomen hyeryne ausz die anfelle aller lehen, also so die ledig werden, das sy von der egenanten Eufemia noch iren erben mit sollen vergeben, noch verkaufft werden, sunder bey ir und dem land beleiben und genossen werden, als lang bisz wir das land wider von in horen, so sollen uns solich anfelle mitsampt dem land wider fallen und komen. Wir behalten uns auch die lehen, als frinnd zum hailigen Crucz zu Bresslaw und ander lehen, die dan des egenanten Puothen seligen briefen auch auszgenomen sein, und wer disen brieff mit der egen Eufemia gutten willen ynne hat, der sol alle die recht zu disem brieff haben, als sy selber, mit urkund et cetera. Datum Prage dominca ante Martini.