Přepis regestovaného dokumentu

Nos Fridricus dei gracia marchio etc., Johannes dux etc., Wilhelmus etc., Ludwicus pfalzgroff aut ejus vices gerens Wilhelmus vicztum etc., magistri civium consules jurati totaque comunitas civitatis Nurbergensis etc. vos nobiles strenuos et spectabiles viros a. b. c. d. et venerabiles eximiosque Procopium presbiterum ac magistros et sacerdotes cum vestra comitiva universis et singulis pariter et rebus quas vobiscum decreveritis deducendas, que tamen persone quadringentessimum numerum non excedant, a data presencium usque ad festum sancti Wenceslai gloriosi martiris ac regni Boemie fidelium patroni proxime venturum continue et absque ulla interpollacione fidelium cristianorum more fideliter tenore presencium treugamus et assecuramus ac in proteccionem nostram fidelem et custodiam assumimus: ut possitis libere et secure ad nos versus Nurbergensem civitatem venire et in eadem demorari, ibique in concilio articulos quatuor, pro quorum claritate instatis, oretenus aut in scriptis offerre aut propallare scripturis sacris beatorumque doctorum verbis et sentenciis eos declarare astruere et persuadere et si opus fucrit etiam ad objecta concilii seu cujuscunque persone respondere aut cum aliquo vel aliquibus de concilio super eisdem collative vel caritative absque omni probro convicio insultu contumelia ac impedimento conferre; et, illis peractis aut non peractis, quandocunque ad propria reverti optabitis, mox absque omni renitencia occasione et mora ad metas regni Boemie secure deducere et in civitate Boemie Tusta nomine statuere debemus et promittimus salvis semper vestris vestrorumque omnium personis honore et rebus; hoc notanter propter bonum pacis procurandum et conservandum luculenter expressantes: quod, si quispiam aut aliqui ex vobis sive in itinere ad nos in Nurbergam veniendo sive ibidem demorando aut redeundo aliquid enorme quod absit! egerit aut egerint per quod posset nostre assecuracionis beneficium vobis et vestris concessum quomodolibet irritari annullari aut cassari, volumus nichilominus admittimus et concedimus, ut talis vel tales in facinore hujusmodi deprehensi a vobis duntaxat et non ab aliis condigna animadversione puniatur aut puniantur, ipsius nostre assecuracionis forma condicionibus et modis omnino manentibus illibatis. est eciam signanter expressum: quod, si quis ex nostris vobis aut alicui vestrum bona ipsius auferendo reciperet seu sermone vituperoso honori vestro detraheret vel si ex permissione dei ex servitoribus vestris vulneraret aliquem aut occideret quod absit!, illorum omnium premissorum illustris princeps dominus Fridricus marchio etc. debebit potens esse et pro facto perpetrato seu comisso exhibere justicie complementum. si autem ex personis superius scriptis senioribus spiritualibus vel secularibus unum vel plures per nos aut nostros qualemcunque mortem subire contigerit quod deus omnipotens avertat! extunc nos omnes prescripti fatemur et tenore presencium recognoscimus nos incurrisse penam subscriptam. preterea assecuracionis et treugacionis nostre formam in omnibus suis condicionibus punctis et clausulis superius expressatis per nos ac nostros universos et singulos amicos socios pariter et subjectos sub pignore nostre fidei cristiane ac nobis innati et quomodolibet acquisiti honoris inviolabiliter inconcusse et fideliter custodire tenere et observare pollicemur, hoc adjungentes: quod eodem assecuracionis beneficio per omnia gaudeant nunccii ad vos de Boemia transmittendi aut per vos ad Boemiam destinandi. insuper promittentes sincera fide sine fraude et quolibet dolo, quod nolumus neque debemus oculte vel manifeste quacunque occasione pretensa uti aliqua auctoritate vel potencia jure aut privilegio legum vel canonum quacunque forma verborum expresso in quodcunque prejudicium vobis aut alicui ex vobis vel vestris aut salvo conductui seu assecuracioni vobis per nos concesso vel concesse sub pena subscripta: quod, si nos prefati aut aliquis ex nobis vel nostris cujuscunque condicionis vel status dignitatis aut preeminencie existens prescripte assecuracionis treugacionis formam et modum in quocumque puncto vel clausula violaverit quod tamen avertere dignetur omnipotens! et sufficiens emenda mox non fuerit subsecuta et vestro arbitrio merito approbanda et laudanda, ex tunc prout ex nunc et ex nunc prout ex tunc nos presentibus censemus et profitemur inglorios pacti et federis cristiani violatores notorios expertes fidei et perjuros ac omni honore et dignitate nudatos. nichilominus eciam pro serenissimo principe et domino domino Sigismundo Romanorum rege etc. et pro omnibus suis subditis et sibi adherentibus necnon pro singulis principibus ducibus etc. episcopis ac aliis spiritualibus et secularibus et aliis, cujuscunque status condicionis vel preeminencie mundi hominibus extiterint, pro eo et cum eo et pro omnibus ac singulis supradictis bona nostra fide promittimus et spondemus: quod idem dominus rex et cum omnibus et singulis premissis predictis et ipsorum omnibus ut premittitur hujusmodi salvum conductum predictum inviolabiliter observabit, quem et nos cum omnibus et singulis ducibus baronibus etc. atque communitatibus inviolabiliter observabimus, dolo et fraude quibuslibet penitus procul motis. in cujus rei testimonium sigilla nostrarum majestatum presentibus benivole et cum matura deliberacione sunt appensa. datum etc.