Přepis regestovaného dokumentu

Unsern frůntlichen dinst zuvor. hochgeborner fůrste lieber oheim. 1 ewer lieb mag wol vernomen haben, wie die unglaubigen von Beheim iecz newlich des ersten die hochgebornen fůrsten unser lieb öheimen von Sachsen mit einer großen macht swerlich ůberzogen und mord und verwůstung irer lande begangen und getan haben. in dem kome uns ein treflich kůntschaft die wir unter den unglaubigen hetten gehabt, und sagt uns wie sie willen hetten auf Eger und das lant hineinzuziehen. deßgleichen komen der von Eger und Ellenpogen rete zu uns, und sagten uns auch wie sie auf Eger meinten zu ziehen und auf Ellmpogen, und růfften uns so ernstlich an unib hilf; wie wir in die nicht toten, so besorgten sie das es nicht gut fur dise lant were etc. wiewol wir nů der unsern selbs wol bedůrft hetten, doch schickten wir in der unsern so treffenlichst wir möchten gen Eger und gen dem Ellmpogen und in ander unsere sloß, und schriben auch unsern heren und frůnden so fleissigst wir immer mochten uns zu hilf und rettung zu kummen ob sie in unser lant ziehen wůrden. solich hilf uns auch von etlichen zugeschriben warde. in dem komen die unglaubigen so gählingen und ungewarnter dinge in unser lant das die unseren vor in nicht zu uns kumen mochten. so was die lantschaft und das ander gemein volke auch verlaufen in die holzer, das sie nicht in die stett und sloß kummen möchten. wiewol wir nů unser herren und frůnde, zu den wir uns hilf und rates verschen hetten, nicht eins sunder manichmal mit grossem ernste angeruffen hetten, und auch iderman solich unser grosse not wol wissenlich was, hat uns laider alles clein fůrgetragen: wir sein von unsern hern und frůnden und von iederman hilflose und ganz verlassen worden, ausgenomen unser herre von Eystett, der uns auf virzig pferd geschickt hat, mit den wir uns nicht behelfen mochten. und dieselben unglaubigen haben auf dem gepirge nicht allein uns sunder auch unsern rittern und knechten unsere sloß stet closter und dörfer angewonnen verwůst verprant und verderbt, das des gar wenig beliben ist. des wir mit der hilf gots den meisten teil wol behalten wollten haben, hetten wir leůte gehabt oder möchten die unsern zu uns kummen sein. wie nů die sache sich ergangen haben, wer zu vil lank zu schreiben. 2 danne in den dingen toten die Bechmischen hanbtleute ein botschaft zu uns: wie sie gern mit uns zu rede kummen wolten etc. das uns, als ewer liebe selbs wol versteen mag, gar swer was zu ton unsern leibe und leben in solich wagnůß zu setzen. doch da wir laider von niemand kein hilf verstunden und die keczer ie mer und mer fůr sich ziehen wúrden und fůrgenomen hetten die lande hieniden auch zu verderben und zu wůsten und auch in die genehe als uf drei meil gen Núremberg kummen waren, haben wir nach rate unsers oheims herzog Johansen der pfleger zu Bamberg unsers öheims und brůders von Oeting, der nů zu uns kummen was, und der von Nůremberg, wie pfentlich und swer uns das gewesen ist, umb eins gemeinen nůcz und der cristenheit willen plutvergiessen und verwůstung der lande zu fůrkummen uns dorein ergeben, und auf ir geleite und glauben zu in in ir here geritten, und auch mit des genanten unsers sheims herzog Johansen der von Bamberg von Oetingen und Nuremberg retten ůberwegen: so wir keinen widerstand oder schickung sie zu bestreiten auf dits male verstünden, mochten wir sie hinder sich außt dem lande geteidingen und weisen, das es vil besser wer danne das sie die lande gar verwusten. darauf haben wir sie in dem besten also mit teidingen auß disen landen ůber Walt pracht, auf das wir fůrder der cristenheit und unsern herrn und freůnden, ob es not tön wůrde, dester bas zů hilf kommen und gedienen möchten, als wir auch mit ganzem vermůgen gern ton wollen, das sie unsere lande hie-zwischen und sand Jacobs tag nicht ůberziben sollen, wann wir in disen dingen ganz nichts verpůnden sein: wir mögen, wenne man wil, wol wider sie tön, wanne sie solicher verbindung gen uns nie gemütet haben. wir haben auch under einander rede gehabt von eins gůtlichen unverpunden tags wegen gen Nuremberg zu kummen auf sand Jorgen tag schirst, darzu man auß den sechß provincien diser lande doctores und gelert leute bringen sol, nicht von dem gelauben zu disputiren sunder unverpundenlich und gůtlich mit in davon zů reden: ob man underweisung finden möchte damit sie von solichen sachen kömen; möcht aber des nit gesein, das man danne gedechte nach rate etlich ander wege zu erdenken und fůrzůnemen damit solich sachen zu ganzem ende kömen. wanne, nach dem und sie auf dits male keinen widerstand gehabt und in nach irem willen ergangen hat, sein sie größlich gesterkt und erkeckt worden, das wir besorgen, wie man die sache nit mit gůtem rate fůrnempt, es sei mit teidingen oder auf ein kůnftigs concilium anzustellen oder ander wege fur hant zu nemen damit solich sache zu ende kömen, das sich die sache und leufte danne weiter machen und geen werden wanne man iecz gedenken mag. 3 und darauf so haben wir unserm heiligen vater dem babst auch unserm gnedigen herren dem Römischen etc. konig unser treffenlich botschaft getan, solich leufte und sache grúntlich zu erzelen, und von irer heiligkeit und gnaden nach dem besten fůrzunemen. und biten auch ewer liebe mit ganzem fleisse und ernste, solich erpermlich leufte und sache zu herzen nemen und ewer doctores und gelert leute zu solichem obgenanten tag zu bringen oder schicken gen Nůrmberg zu helfen und zu raten ob solich sache gestillet und zu gutem ende pracht möchten werden. davon ewer liebe und alle die darzu gehelfen mögen nicht allein den ewigen lone von got sunder auch lobe und ere von der heiligen cristenheit haben werden.