L. Fr. Als Ir vns verschriben vnd von wechselswegen den ewern in das her zubestellen gebetten habt etc., das haben wir wol vernomen. Nu hetten wir von vnser selbswegen nu langst gern gelt in sölichen form bey vns verwechselt, den vnsern in das her zu antwurten, so haben wir des bey vns niht mugen finden; doch haben wir vmb ewern willen vnsern fleiss getan vnd noch bas darnach fragen lassen, vnd können des zu disen zeiten bey vns nicht finden noch erforschen, da mag sich ewer frewntschaft wol nachrichten. Und als ir vns gebetten habt von der lewff wegen von Beheim herawsz etc., lassen wir ewer weisheit wissen, daz vns von einem vnsern guten frewnd auf gestern bottschaft komen ist; der schreibt vns, daz sich vnser gnedig Herren die kurfürsten am ertag vor nativitatis Marie 2 Sept. für ein sloss genannt Maschaw legerten vnd vnser püchsen vnd zewgs auch darczu begerten, die an der Mitwochen 3 Sept. darnach auch dafür kemen. Also rytt vnser gnediger Herre ... der Pfallntzgraf selbs vnd weiset die stat, dahin man vnser püchsen legen sölt, das were dem sloss fast nahent gegen dem turn und tor; vnd do fertiget man all sache, vnd darnach des morgens frw lüd man die puchsen vnd wölt arbeyten. Do sie das auf dem sloss sehen, da ruften sie zu stund vmb frid, also gryff man zu teydingen, daz sie sich geben. Der hawbtman auf dem sloss vnd VIII mit Im beliben bey leben vnd seyn der fürsten gefangen, die andern wurden yemerlich zu tod geslagen vnd verprant, der weren an einem sail LXXXIIII ; ein pfaff vnd drey fund man darnach im haws, die wurff man vber die mawr awsz vnd wurden auch verprant. Item das fussvolk, daz da awszlawft, was niht dewtsch kan oder einem Beheim gleich ist, das werde gefangen, zu tod geslagen vnd verprant, wan das volk well sich niht wol maistern lassen, wan das Her sey grosz vnd měchtig; vnd auf den vergangen samstag 7 Sept. wölt man zu rat werden, für welche statt oder sloss man fürbas ziehen wölt. Denn wo wir ewer ersamkeit lieb oder Dienst etc. Datum ut supra feria VI^a ante exaltationis sancte crucis.