Přepis regestovaného dokumentu

Sigmund von gots gnaden Romischer keyser zu allen czijten merer des reychs und zu Ungeren zu Behem etc. kunig.

Lieben getruwen. wann wir manigfeldiclichen vernomen han, wie in dem heyligen reyche und nemlich Deutschen landen grosse und swere leuffe uferstanden sein, dadurch kriege und widerwertickeit in den landen teglichen ye me und mee wachssen, also das des reichs strasse zu wasser und zu lande nidergelegt und schedlichen verhindert werden, das man der ane grosse sorge und arbeyd nicht gebruchen muge; so werden auch unsere und des reichs achte und aberachte versmehet, und vil fursten graven herren und stete tun dawider offentlichen den ungehorsamen rat und hulffe; so sin auch sußt an offenen und hemelichen gerichten soliche gebrechen, als wir teglich vernemen, die da notdurftiglich zu besseren weren; desglichen von der muncze wegen, die auch den landen schaden bringet; und wann nu soliche vorberurte sachen und gebrechen unser keyserliche gemute zuvor besunder beweget hant und noch bewegen, und wir alleczijt gerne darczu wolten getan han und noch tun mit rate und beystant unserr kurfursten und auch anderer fursten graven herren und stete, damit soliche sache und gebrechen versehen und nach notdurft gesatzt und geordnet weren worden und noch werden mochten: und darumb so hann wir ytzund denselben unsern kurfursten fursten graven herren und steten ernstlich geschrieben zu uns gen Eger zu komen uff den heiligen phingstag schierest folgende, darynn wir sie, als wir nicht zweyfelen, willig fynden. und davon so begeren wir von uch mit gantzem ernste, das ir uwere merckliche frunde von solichen sachen underwiset mit follem gewalte, nicht wider hinder sich zu bringen, daselbshin gen Eger zu uns schickent uff die vorgenante zijt, in solichen sachen helffen zu raden die zu handelen zu besliessen und den nachzukomen, als dann notdurftig sein wirdet. dann wie grosse und treffliche sachen wir ytzund alhye in dem lande zu Behem zu schicken haben, als ir selbs wol versteen muget, so wollen wir uns doch umb des reichs ere und des gemeynen nutzs willen darczu mußsigen, das wir uff die obgenante zijt, ab got wil, zu Eger sin wollen, wie ungelegen und uneben uns das auch sein werdet. darumb so wollent darynn nicht sûmen, das uwerenthalb soliche lobliche sache nicht hinderstellig werden, als ferre ir uns mit ychte willen und wolgefallen bewisen wollet. das ist unsere ernste meynunge. geben zu Prage am mantage nach dem sontage oculi unserr reyche des Ungrischen etc. in dem 50 des Romischen in dem 27 des Behmischen in dem 17 und des keysertums im 40 vierden jaren.