Přepis regestovaného dokumentu

Minen under dinge steden willgen denst. To allen getiden ume wez ik vor mach ersame durchluchtege grosmechtege leven gnedige here inwer gnade wisheit, do ik kunt dar, ik de tafele mit deme heilgetome hebbe gesant deme habtman von Jegerdorfe mit deme brefe etc. Item leve gnedige here alzi inwer gnaden wisheit, mi boshaft hadde ume dem herre bishop van der Nycze czu manlung ume VIII^c shock dar ume, waz ik von sinen gnade gered von der beristat ume gaf eme inwer gnadliche und ok warf ik muntlik dar von alzo mi befelt, waz dar up antwerde he mi unde sprak he walde kamen von Breslowe unde wolde mi ein gulik antwerde segen alzo uz he nach hir nicht gekomen sunder ik beide siner noch hir dozem dach. Item alzo inwr gnaden mi befol an her Nichlaz Bunczelowe ume de C gulde dez willet wete leve gnedige here, daz her Niclaz Bunczlowe nicht hir ik bunden se hopen alle dage he sole hir gelt senden anderz ik mi noch gen antwerde ge worden. Item gnedigen alz um dem walschen win dem ik inwer gnaden scholde kopen hir, ik gen de inwer gnaden doch sunder ik hope hir werde noch war komen binen VIII dage komet de dem wille ik inwer gnaden bringen. Item zo en kan ik inwer gnaden in nicht enkdez gesen van deme koninge van Unger sunder dat he licht vor Prage unde de husse sint eine hertlik untgegen, ik en wet inwer gnaden herlikit nicht mer von sen dan minen denst unde got van hemele motz in bewaren an live unde an sele ik hope af got wil binen achtagen bi inwer gnaden to sin. Geschreben in Breslowe VIII dage na sunt Johanz baptiste dage anno domini XIIII^c XX jar. Bi mi Wedege Mozer de gnacze juwe dener.