Přepis regestovaného dokumentu

Nos magistri civium, consules et scabini ac communitates majoris et novæ civitatum Pragensium tenore præsentium recognoscimus universis publice protestantes, quod cum omnipotentis dei immensa sapientia cunctorum se diligentium gubernatrix et domina nos sæpe licet immeritos penitus et indignos manu suæ exactæ diligentiæ mirabilique gratia lætificet et confortet: inter alia tamen præeclara omnipotentis miracula, quibus orbem lætificat, hoc est præcipue cordi nostro, quod reverendissimus ni Christo pater et dominus, dominus Conradus sanctæ Pragensis ecclesiæ archiepiscopus et apostolicæ sedis legatus, dignante et suadente dei gratia, non sine grandi et matura deliberatione suorum fidelium tam spiritualium quam secularium, veritatem quatuor articulorum, pro quibus felicia et majora fide bella gerimus, et vincente pro nobis domino, victores regum exsultamus, nam illis nec totus orbis par esse dinoscitur et omnis humana principum et regum potestas exstat inferior, illustrante illum, ut speramus, divina gratia cordiali effectu et affectu, velut veros et catholicos sponte et benevole credidit, amplexatus est et suscepit, quorum articulorum continentiam in reversiva ipsius domini Conradi archiepiscopi nobis facta sub conditionibus ibidem appositis et per nos approbatis plene expressatur : illosque nobiscum per omnia vitæ pericula ac rerum damna usque ad mortem manutenere et inviolabiliter observare contra omnes et singulos prædictorum articulorum adversarios et contemptores spirituales et seculares, publicos et occultos, et præcipue contra crudelissimum et omni impietate plenum Sigismundum regem Ungariæ, omnibus viribus et rebus defendere et tueri vovit et promisit. Quapropter cum omnium nostrum firma sit spes in domino nostro Jesu Christo, quod ex hoc admirando dei beneficio, quo illum nobis divina pietas in fide et fidei vero obsequio animo et corpore cordialiter counivit, ad promovendamque justitiam extinquendamque omnem nequitiam et reprimendam universorum inimicorum malitiam, Christi ipsum tribuit adjutorem, per nos gratanter et hilariter susceptum, ex quo volut quadam magnorum bonorum beata origine, quæ nobis ardua spes a domino ventura repromittit, possunt regno Boemiæ nostro nova prodire gaudia, felices mores et optata vivendi a deo gratia. Ideo his causis tamquam benemeritis paci regnoque hujusmodi Boemiæ congruissimis aliisque commoditatibus corporum et animarum, quæ inde oriri speramus, diligenter inspectis, consulti et permoti, præsertim ejusdem domini Conradi archiepiscopi pio et simplici corde cordialique affectu quem ad veritatis promotionem habebat commoniti, eidem domino Conrado Archiepiscopo sub fidei et honoris pignore potissimo bona nostra fide promittimus unanimiter et spondemus, eidem in singulis ipsius periculis, damnis et jacturis ac dispendiis et perturbationibus seu inquietationibus universis prætextu defensæ ejusdem legis divinæ et adhæsionis supradictæ veritatis quatuor articulorum ac nostræe assistere et fideliter adhærere, contra quemcunque legis dei et signanter hujusmodi quatuor punctorum adversantem, inimicum et turbatorem, et præsertim regem Sigismundum prænotatos ac alios quoscunque ipsius cujuscunque status, gradus, conditionis seu præeminentiæ spiritualis vel secularis exstiterint adjutores, nec ipsum in aliqua desertum gravitate quomodolibet relinquere, sed omnia contigentia periculorum ad ultimum simul cum eodem ferre et sustinere usque ad ultimum exterminium virium nostrarum, corporum atque rerum, omni dolositatis occasione segregata. Datum feria secunda ante festum S. Georgii anno domini M.CCCC.XXI. sub appensione sigillorum nostrarum civitatum prædictarum in evidentem præsentium roboris firmitatem.