Přepis regestovaného dokumentu

Mein demutigin phlichtigin getrawen dinst zuvor. grosmechtiger liebir gnadiger herre. ich thu ewern gnaden zu wissen: das also gestern erbar muntliche und briffliche botschaft bei meinen gnadigen herren dem bischofe und gemeineclich allen fursten der Slesien von meinen herren den korfursten gekomen ist, die manchirlei schreiben das ewern gnaden zu lang zu virkundigen were, sundir beslissende und entlich: so wellen sie an allen vorzog in eigener personen als meine herren die erzebischofe von Tryr und Kaln der phalzgrave vom Reyne mit vele andern fursten, geistlich und wertlich, groven und sechsunachzig reichstete macht uf sente Bartholomeus obent nehstzukumftig zu Egra in Behmen mechticlich sein, und also mit macht Missen Slesien Saxen Brandenburg Doringen Maidburg und faste mer landen in das konigreich von Behmen zihn und den unglawbigen Wicleffin und Hussin kaczerei zustoren. und meinen keinirleiweis aus dem lande zu zihnde sie haben denne die kaczerei und den unglawbin gedemft, wenne sie umbe und umbe in allen landen umbe Behmen gelegin um koste und notdorft en zuzufurende bestalt habin. ouch, liebit gnadiger herre, haben sie mit vele fursten und herren gemeiniclich allir Dewtschir zunge einen bunt begriffen und gemacht, dorin mein herre sich sampt mit andern fursten der Slesien meint zu gebin unde seine wirdige botschaft dorumbe iczunt gesant hat. des habe ich, liebir gnadiger herre, mit meins herren gnoden, der allewege des ordens best sůcht, gewegin: were is ewern gnodin bequeme und nůtze euch mit ewerm orden in einen sulchin bunth zu gebin, das wurde mein herre von der korfursten und andir furstin wegin ganze macht haben euch und ewern gnaden dorein zu nemen. des buntbriffis ausschrift zendit euch David Rosinfelt dornoch sich ewir gnade richten und bedenken mag. ouch geruche ewir gnade zu wissen, das itzunt der vorgeschreben korfursten rethe und vorbothen worhafticlich mit funfhundirt pherden ken Egra in Behmen gekomen sein und do irer herren beiten werden und en notdorft bestellin. ouch wisse ewir gnade, das mein herre der Romische konig mit dem von Ostereich umbe das frowlin von Hungern und alle andir sachin sich genzlich geeinet hat. und der von Ostereich der leit dem konige zwehundirtawsint bereiter gulden. dovor her em eingegebin hat und vorsaczt die nochgeschreben stete und lant: in Behmen Budwis, in Merhern Snewma Egla Campnicz und Scalicz, so das der von Osterich mit alle seiner macht meinem herren dem konige vorgeschreben beisthehn und helfin wil bis zum ende. ouch thu ich ewern gnaden zu wissen, das die korfursten dem konige von Polan einen ernsten briff von der enthaldunge und gunnunge der bothen der kaczer geschreben haben, de copien ich ewern gnaden hirinne zende vorslossen. und wurde ewir gnade in den adir andern sachin icht zu rothe mit wedir zu schreiben, do welle ich mich als ewir getrawir armir capplan allezeit getrawlich fleiseclich und dinstlich inne beweisen. und wisset, das ich ie ewir gnaden und des ordens getrawir capplan sterben wil. ouch wisse ewir gnade, das der konig mit eigener personen mechticlich mit den Hungern ken Behmen genzlich und kurzlich meinet zu zinhnde. und hat itzunt wol zwethawsint phert ken Merhern in das lant gelegt die lant zu beschirmen, und die seiner gnoden do beiten werden. die botschaft hat mein herre auch gestern mit seinem eigen bothen von Hungern worhafticlich gehat. ich bevele mich ewern gnaden als meinem gnadigin herren. gegebin zu Bresslaw an dem tage divisionis apostolorum.