Přepis regestovaného dokumentu

Wir Sigmund, von gots genaden Romischer kunig, zu allen zeiten merer des richs und zu Hungern, zu Beheim, Dalmacien, Croacien etc. kunig, embiten allen und yglichen fursten, geistlichen und werntlichen, graven, freyen, edeln, rittern, knechten, vogten, amptleuten, burggraven, hauptmannen, richtern, zolnern, burgermeistern, reten, burgern und gemeinden der stete, merckte und dorffere und sust allen andern unsern und des richs und der crone zu Hungarn und zu Beheim undertanen und getreuen und nemlich den in der Slesien, in den Sechssteten, Lusitz und in andern unsern landen und steten gesessen unser genad und alles gut! Erwirdigen, hochgebornen, edeln und lieben getreuen! Wann die ketzer von Beheim so frevelich sich ytzunt uffgeworffen habent, das sy sich nicht allein in irer verdampten boszheit, die sy in unserm kunigrich zu Beheim leyder begangen hant und noch teglich tun und unmenschlichen begeen, benugen lassen, sunder ouch andre umblegen lande von dem rechten cristengelauben zu bringen, mit manigveldigen schaden zu ziehen versuchen und ouch mit mord und brande unmenschlich dringen, das laider so vil ist, das es lang were alles hie zu schreiben; wann nu unsere lieben getreuen die burgermeister, rate und burgere der stat zu Gorlitz sich so grosse und swerlich an irem gute und hab angegriffen hant, den vorgenanten ketzern zu widersteen und dieselben stat fur iren gewalt zu behalten, und dorumb so grosse koste und darlegung getan und schaden geliden und empfangen habent, als wir vornemen, das sy davon iren schuldigern den leuten, den sy zinsze und gulte erlich zu geben pflichtig sind, nicht alsbalde und schir mogen bezalen und uszrichten, als sy gern teten, dovon mit in billich mitleydung zu haben ist: Darumb mit wolbedachtem mute, gutem rate und rechter wissen haben wir den vorgenanten burgermeister, rate, burgern und inwonern der stat zu Gorlitz dise besunder genad getan und thun in die von kuniglicher macht und geben in und ir yglichen freyheit und unser sicher geleyt, das sy von sulcher zinse, leipgedings und geltschulde wegen, die sy den leuten pflichtig sind zu geben, auszwendig oder inwendig gericht, in dreyen jaren nechstkunftig nach einander volgende von datum ditzs briefes an zu zelen von nyemant, wer der ist oder welche die sind, sollen werden bekummert oder uffgehalden in keinweis und das man sy ouch mit gericht dorumb nit solle umbtreiben. Und dovon begeren und gebiten wir euch und euer yglichen ernstlich und vestiglich von kuniglicher macht in kraft ditzs briefs, das ir die vorgenanten burger und inwoner der stat zu Gorlitz durch unsere und euere land, stete, merckte, dorffer und gebite zu wasser und zu lande hin und wider, so offte und dick in das not ist, sicher, frey, ungehindert und ungeirret reiten, varen, ziehen, wandern und iren nutz, gewerb und kaufmanschafft dorynn und dorusz handeln, suchen und treiben lasset und sy ouch geleitet und geleiten schaffet, wo des not ist und das an euch begert wirdet, und sie und ire guter ouch von sulcher zinsze, leipgedings und geltschulde wegen nicht uffhaldet noch bekumert in unsern und euern gebieten und landen noch bekumern oder uffhalden lasset, sunder in guten furderlichen willen beweiset, das sy desterbas bey euch und in euerim gebiete ire narung besuchen und iren nutz werben und handeln und iren geltschuldigern desterbas bezalen und uszrichten mogen, das sy ouch in der zeit nach irem vermogen fleissiglich tun sollen. Und wir wollen, das dieser unser brief genad und freiheit gentzlich drey jare lang nechstkunftig nach datum ditzs briefs nach einender volgende unverruckt von einem yglichen gehalden werd bey beheltnusz unser hulde. Mit urkund ditzs briefs versigelt mit unserm kuniglichen anhangenden insigel. Geben zu Feltkirchen nach Crist geburt 1400 jare und dornoch in dem 31. jare an sand Michelstag, unserer riche des Hungerischen etc. im 45., des Romischen im 21. und des Behemischen im 12. jaren.