Wir Sigmund von gotes gnaden Romischer kunig zu allen eziten merer des richs und ze Hungeren zu Behem etc. kunig embieten dem hochgeboren Fridrichen margraven zu Brandenburg des heiligen Romischen richs erczkamerer und burgraven zu Nurenberg unserm lieben oheim und kůrfürsten unser gnad und alles gůt. hochgeborner lieber oheim und kurfurst. wiewol in unserm kunigrich zu Behem von vil jaren bißher leider vil unfürs unmenschlikeit und yamers begangen worden ist von den verbosten keczeren, die alle gesecz und ordenung der heiligen kirichen und kristenlichs gloubens zurukgeslagen, mit mord brand kirichenbrechen vertilgung geistlichs stattes des ganczen adels und vil fromer kristen so manig ubel begangen haben und teglich begeen daz das kein menschlich hand volkomenlich volschreiben kan: und dorumb daz das in allen umbgelegen landen, got sey geclagt, landkundig ist, so ist nicht notdurfftig solch unfür (die nicht alein heslich zu begeen sunder ouch zu hôren und zu sehen sein) in diser schrift ußczudruken. und wiewol von uns und anderen kristenlichen fursten herren steten und anderen ettwedike dorczu gegriffen und zug und ordenung gemacht und getan worden sind damit man solchen yamer ußt der mitt der kristenheit ußgerutten und getilgen mochte, so habent doch alle menschliche synne und tatt villicht durich last willen unserer sunde und von verhengnússe wegen des almechtigen gotes keinen entlichen ußtrag gehaben můgen, sunder dieselb keczerey sleicht also teglich ye verrer ye verrer. und wo die nicht in zeiten understanden wiert, so ist zu besorgen, daz die also wachsen mag, ob man hinfur gerner dorczů tůn wolde, daz das nicht so leichtlich zugeen můgen wiert. und wiewol wir teglich und an underloß mit unseren luten und gelt gen denselben keczeren grôß darlegüng und allen unsern fliß tün und uns gen in on meniclichs hilffe uber macht erstreken als dann das wol offenbar ist, yedoch so haben wir yezund allhie mit derselben keczer hoûptlûten und eldisten die sy zu uns gesandt hatten, mit rat vil unserer und des richs und unserer kunigrich zu Hungeren und zu Behem prelaten fürsten herren lerer in der heiligen schrifft der universitet von Paris und von Wyenn und vil anderer gelarter treflicher lute und stete beywesen und rat, einen tag geleisst und in alles das erbotten das wir mit got und eren getün machten. und haben das dorumb getan, daz wir mit in alle ding versuchten und nichts underwegen liessen, damit man solch vergiessen menslichs blutes gestilt und sy in die schoß eynung und gehorsam der heiligen kirichen bringen mochten. das aber nicht hat gehelffen mügen sunder sy begeen und tůn yezund teglich unpilde und yamer grosser dann sy vor ye getan haben, glicher weyß als ob sye kristenlichen namen genczlich ußleschen und tempfen wolten. und dorumb so sein wir erczundet worden und haben mit rat der vorgenanten prelaten fursten herren und lerer etc. fur uns genomen, das wir des nicht lenger leyden, sunder, dem almechtigen got zu eren und zu lob kristenlichem glouben zu sterkůng und zu erlosung aller frômer kristen die von denselben keczeren gedrungen und alle tag verderbt werden, unser macht und alles vermugen dorezû wenden wollen damit wir disen summer in Behem mit unser selbs persone ein stark felde machen und solchen keczeren mit der hilff gotes widersteen mugen. und meynen ouch uff sand Johanstag baptiste schiristkomend unverczogenlich in dem feld zu sein. wir haben ouch alle ander unser und des heiligen richs fursten herren und stete mit unserer botschafft und ouch schrifften ermanet begert und gebeten sich in solchen grossen und notlichen sachen der heiligen kristenheit dorczüstreken und uns nach allem irem vermugen zu helffen. und wir getrawn zu got, daz sy sich des nicht wideren werden, nach dem und ein iglich kristenmensch den gotlichen namen unsers herren Jesu Cristi, von dem er leib leben und wesen hat, billich biß in den tod retten sol, der durich unsern willen den tod an dem heiligen krewcz nicht wolt versmehen. dorumb begern wir von deiner lieb und bitten die mit fleiß und ermanen dich ouch so wir hochste mugen solcher pflichtung der du got dem heiligen glouben uns als einem Romischen kunig und dir selbs schuldig bist, daz du durich der vorgenanten gotlichen und erberen sach willen uns gen den egenanten keczeren mit allem deinem vermugen zu hilff ziehest mit volk zu roß und zů fůssen wagen buchsen klein und groß und ander gereitschafft die du dann mit dir bringen magst, und uff den vorgnanten sand Johanstag also bey uns in dem felde seyst, und dich dorumb zu unserer botschafft dem edelen Heinrichen von Plawen unserm und des richs burgraven zu Missen hoffrichter und lieben getruen uff den suntag vor pfingsten nechstkunftig gen Mai s Nurenberg fugen oder aber dein treflich botschafft mit voller macht dahin senden wollest nit wider hinder sich zu bringen, der dich aller unserer meynung wie wir das beslossen und geordent haben von unsern wegen genezlich underrichten werden; dem du ouch dorynne genezlich als uns selb gelouben, und bey im entlich antwurtt geben wollest: wie stark uff welch zeit und in welcher masse du also zu uns komen magst, daz wir uns dornach wissen zu richten. doran verdinstu von dem almechtigen got grossen lôn von der werlt er und lob, und wir wollen das ouch gen dir alczit gnediclich erkennen. geben zu Prespürg an suntag misericordia domini unserr rich des Hungerischen etc. in dem 43 des Romischen in dem 19 und des Behemischen in dem 9 jaren.